Брыгаду хуткай і неадкладнай медыцынскай дапамогі з 26 верасня можна будзе выклікаць толькі па нумары 103, па тэлефоне 36-3-03 заяўкі прымацца не будуць.

Iнфармацыйная дошка, прымеркаваная да 155-годдзя Магдалены Радзівіл, будзе ўстаноўлена сёння ў вёсцы Дуброва. Мерапрыемства распачнецца ў 13 гадзін.

Два залатыя медалі атрымала ВУП “Малочны полюс” на Міжнароднай канферэнцыі Еўразійскага эканамічнага саюза па вытворчасці і перапрацоўцы малака, якая праходзіла ў верасні ў г. Сочы. Прадукты-фаварыты — сыроватка сухая малочная дэмінералізаваная СД-90 і сырок тварожны глазураваны “Веселые внучата” з какосавай стружкай і водарам ваніліну.

22 тысячы тон цукровых буракоў паступіла ад гаспадарак нашага, Бабруйскага, Кіраўскага і Пухавіцкага раёнаў з пачатку верасня на Асіповіцкі буракапрыёмны пункт Слуцкага цукроварафінаднага камбіната. Ураджай культуры значна лепшы, чым летась: у 2015 годзе за ўвесь сезон было прынята 32 тысячы тон салодкіх караняплодаў.

ЗТАА “Белфідагра” за студзень-жнівень адправіла за межы краіны 5599,4 тоны прэміксаў і бялкова-мінеральных вітамінных дабавак. Аб’ёмы экспарту склалі 5937 тысяч долараў ЗША. Асноўныя партнёры прадпрыемства знаходзяцца ў Расійскай Федэрацыі.

7 гандлёвых пляцовак — 6 у райцэнтры і 1 у пасёлку Ялізава — вызначаны для правядзення восеньскіх сельскагаспадарчых кірмашоў.

Рабіна, чый ураджай у гэтым годзе асабліва шчодры, прымаецца ва ўсіх магазінах райспажыўтаварыства. Кошт за кілаграм ягады — 20 капеек.

Цэнтр творчасці дзяцей і моладзі сёлета мае ў розных населеных пунктах раёна 3168 выхаванцаў, якія наведваюць 228 аб’яднанняў.

Капілкі — менавіта гэты тавар стаў карыстацца павышанай папулярнасцю сярод наведвальнікаў гандлёвых кропак Асіповіцкага філіяла ААТ “Магілёўсаюздрук” пасля ўвядзення ў абарот манет. Зараз лінейка “зберагальнікаў сямейных скарбаў” налічвае каля трох дзясяткаў разнавіднасцей.