З 10 па 12 студзеня ў Брэсце прайшла пятая
Міжнародная калядная сустрэча-фестываль дзіцяча-юнацкай творчасці “Мы
разам”. Узгаданае мерапрыемства аб’ядноўвае дзяцей і моладзь з розных
куткоў былога Савецкага Саюза, якія праяўляюць свае здольнасці ў мастацкім
напрамку. На гэты раз туды з’ехаліся калектывы з Масквы, Санкт-Пецярбурга,
Мурманска, Анапы, Ямала-Нянецкай акругі і г.д. Усяго ў канцэртнай праграме
прынялі ўдзел 43 танцавальныя і 6 тэатральных калектываў і
37 салістаў-вакалістаў.

Сцэнічнае хваляванне, атмасфера сапраўднага спаборніцтва,
апладысменты глядзельнай залы — адчуць усё гэта вельмі важна для пачынаючых
артыстаў. А яшчэ — магчымасць павысіць выканаўчы ўзровень, пачуць выступленні
сваіх равеснікаў з розных гарадоў не толькі роднай Беларусі, але і з блізкага
замежжа. Упершыню ў фестывалі прымалі ўдзел і юныя асіпаўчане: навучэнцы
дзіцячай школы мас-тацтваў № 1 — разам са сваімі выкладчыкамі Людмілай Богук і
Марыяй Шабуневіч, а таксама выхаванка МПЦ “Равеснік” Анастасія Шылец — з
музычным кіраўніком Аксанай Мысюцінай.

Людміла Міхайлаўна парадавалася за сваіх юных
артыстаў-тэатралаў Дар’ю Еўдакімовіч, Валерыю Чыгілейчык, Кацярыну Чорную,
Хрысціну Гарадзецкую, Таццяну Спіней, Мікалая Хлуса, якія цудоўна справіліся з
ролямі падчас пастаноўкі казкі “Тры парасяці”. Марыя Яра-славаўна разам з
выхаванцамі Аняй Бандарэнка, Ільёй Яфімавым, Оляй Чарнаморавай, Лалітай
Мікалайчык, Аняй Васільевай, Уладам Вікторчыкам, Алегам Юнчыцам, Максімам
Марусам, Уладам Барышнікавым, Косцем Стрэльскім, Ягорам Германам і Дзмітрыем
Шчарбаковым на суд журы вынеслі свае віртуозныя танцы. Як вынік, абодва
калектывы атрымалі Дыпломы I і II ступеней адпаведна.

Не абмінуў поспех і Нас-цю Шылец, якая была
лепшай у намінацыі “эстрадны вакал” (сярэдняя група).

— Аб фестывалі даведаліся праз інтэрнэт, —
гаворыць дырэктар ДШМ № 1 Святлана Цвірко, якая была кіраўніком групы, — і
вырашылі абавязкова прыняць удзел. Нам ёсць што паказаць, прафесійнае
майстэрства мастацкіх калектываў даволі высокае — неадна-разова вярталіся з
абласных і рэспубліканскіх конкурсаў з Дыпломамі высокай вартасці. Адпраўляючы
заяўку на конкурс, спадзяваліся на перамогу і вельмі хваляваліся: ці атрымаецца
так, як трэба. І якія былі шчаслівыя, калі занялі вышэйшыя прыступкі ў сваіх
намінацыях! Але самае галоўнае, выкладчыкі змаглі абмяняцца вопытам з калегамі,
дзеці атрымалі цудоўную магчымасць зносін. А ўсе разам яшчэ раз пераканаліся,
што дружба паміж народамі не мае межаў!

Акрамя конкурсу, удзель-нікі мерапрыемства
змаглі наведаць Брэсцкую крэпасць-герой, пабываць у Белавежскай пушчы, нанесці
візіт Дзеду Марозу ў яго казачнай рэзідэнцыі. Усё гэта стала магчымым дзякуючы
фінансавай падтрымцы райвыканкама і пры непасрэдным удзеле ў арганізацыі
паездкі начальніка аддзела культуры Ірыны Раманчук. Яна паверыла ў
прафесіяналізм і талент юных артыстаў, і тыя цалкам апраўдалі надзеі. Зрабіўшы
важны і ўдалы крок на першым конкурсе такога буйнога маштабу, таленавітыя юнакі
і дзяўчаты спадзяюцца і ў будучым пакараць сцэны іншых прэстыжных творчых фестываляў.

Ніна ВІКТОРЧЫК.