Вялікай павагай у нашым раёне карыстаецца
беларуская песня. Пачуць яе можна за святочным сталом і ў дзіцячым садку, на
свяце горада і прафесійнай сцэне. Прычым на апошняй не так і рэдка. Шмат у нас
і народных калектываў, якія цешаць душы асіпаўчан і жыхароў іншых рэгіёнаў.
Многія з іх годна выступалі на абласных конкурсах, фестывалях, некаторыя — і
на рэспубліканскіх.

У снежні праводзілася рэспубліканскае
свята-конкурс, прысвечанае 100-годдзю з дня нараджэння кампазітара і этнографа,
вялікага патрыёта і адданага сына свайго народа Г.І.Цітовіча. Заснавальнікамі
гэтага грандыёзнага фэсту з’яўляліся Міністэрства культуры Рэспублікі Беларусь,
Федэрацыя прафсаюзаў, а таксама Саюз музычных дзеячаў нашай краіны. Праходзіла
яно ў два туры. На адборачным было праслухана каля 60 калектываў. І толькі 21
быў удастоены гонару ўдзельнічаць у за-ключным гала-канцэрце, які адбыўся ў
Беларускай дзяржаўнай філармоніі.

З Магілёўскай вобласці прафесійнае журы адабрала
два калектывы, якія глыбока ўразілі вытанчаны музычны слых знаўцаў беларускай
песні і іх узнёсла-рамантычную душу — ансамбль песні і танца ўстановы адукацыі
«Магілёўскі каледж мастацтваў» і народны ансамбль беларускай песні і
музыкі «Дзівакі» Асіповіцкага аддзела культуры.

Нашы землякі ў чарговы раз пацвердзілі высокі
выканальніцкі ўзровень, непаўторную самабытнасць, уменне творча апрацаваць
фальклорныя творы, перадаўшы ў іх мажорна-мінорныя матывы народнай песні,
глыбокае разуменне пачуццяў і перажыванняў. Здаецца, што асіповіцкія салоўкі
спяваюць самі пра сябе — настолькі шчыра і душэўна выконваецца кожная песня.

У выніку «Дзівакі» прывезлі ў горад
Дыплом ІІІ ступені і шмат станоўчых уражанняў.

Іна Заскевіч.