Падручнікі даўно здадзены, гадавыя ацэнкі атрыманы — самыя доўгія канікулы з радасцю і гарэзлівымі ўсмешкамі прыйшлі ў жыццё ўсіх школьнікаў. Хтосьці спіць да абеду, некаторыя паспелі з’ехаць да бабуль-дзядуль у вёску, але ёсць і такія, хто з задавальненнем працягвае наведваць свае навучальныя ўстановы: з пачаткам лета пачалі працаваць лагеры дзённага знаходжання.

— Сёлета мы арганізавалі сумешчаны з трэніроўкамі адпачынак для 87 юных спартсменаў, — адзначае дырэктар ДЮСШ Сяргей Пацкевіч. — Гэта такія накірункі, як валейбол, футбол і кікбоксінг. Хлопцы і дзяўчаты знаходзяцца на ФАК «Юность» і стадыёне «Олимпиец«. Змена працягнецца да 24 чэрвеня.

Пачынаецца спартыўная раніца тут, зразумела, з зарадкі. Потым — сняданак у сталовых СШ № 4 і гімназіі, дзе не проста кормяць, а яшчэ і рознымі прысмакамі частуюць: садавіна, ёгурты, сокі, вітаміны. Калі добра падмацаваліся, пераходзяць непасрэдна да трэніровак. Футбалісты з энтузіязмам ганяюць мяч па полі, валейбалісты атакуюць сетку, байцы муай-тай б’юць баксёрскія грушы.

Так працягваецца дзесьці да гадзіны дня, пасля абеду — іншая праграма. Напрыклад, тыя ж футбалісты разбіраюць тэарэтычныя пытанні свайго віду спорту, абмяркоўваюць матчы і інш. У 14.30 — падвячорак, а потым і час збірацца дадому, каб сустрэцца заўтра.

Дзеці з задавальненнем наведваюць спартыўны лагер, — адзначае футбольны трэнер Аляксандр Елезаранка. — Амаль усе мае выхаванцы жывуць на «Баме«, таму ім вельмі зручна дабірацца. Ды і замест таго, каб гараваць ды гультаяваць дома, хлопцы праводзяць час весела і актыўна. Ды і пра ежу турбавацца не патрэбна — гэта ўжо плюс для бацькоў. Дарэчы, некаторыя дзеці не проста наведваюць лагер, а яшчэ і на спаборніцтвы паспяваюць з’ездзіць. Энергіі хапае на ўсё!