Каля 100 работ 14 асіповіцкіх фотааматараў і прафесійных фатографаў ужо прэтэндуюць на перамогу ў раённым фотаконкурсе “Зямля пад белымі крыламі”, які штогод праводзіцца РЦК. Прыём конкурсных работ працягнецца і на наступным тыдні, таму — паспяшайцеся!

Распачалі работу дзіцячыя летнікі. Прышкольныя, з дзённым знаходжаннем, прынялі 815 рабят, сярод якіх 15 дзяцей-інвалідаў і 25 малых, застаўшыхся без апекі бацькоў. Не толькі прыемна, але і карысна праводзяць вольны час 100 юных спартсменаў, якія наведваюць дзённы лагер на базе ДЮСШ, і 80 дзяўчат і юнакоў, што ходзяць у летнікі працы і адпачынку. У стацыянарных “Пцічы“ і “Роднике“, што працуюць у 3 і 4 змены адпаведна, паправяць здароўе 550 хлопчыкаў і дзяўчынак, 150 з якіх — дзеці работнікаў бюджэтнай сферы. Кругласутачнае знаходжанне забяспечваюць таксама профільныя і лагеры працы і адпачынку: за лета яны прымуць 185 і 30 рабят.

Падчас акцыі “Стоп — неверный шаг!”, праведзенай 28 мая АУСТ сумесна з БРСМ, працаўнікамі станцыі Асіповічы, вагоннага дэпо і стралковай каманды станцыі Асіповічы, больш за 300 жыхароў і гасцей раёна атрымалі памяткі з рэкамендацыямі па бяспечных паводзінах на чыгуначным транспарце.

Аўтапаркам № 19 за студзень-май прададзена 530.762 разавыя талоны, 3.681 праязны на месяц і 2.665 — на дэкаду. Зараз кошт талона складае 4 тысячы, месячнага і дэкаднага праязнога — 153.000 і 53.600 рублёў. Набыць іх можна ў касах аўтастанцыі і на пошце, у кантралёраў і вадзіцеляў аўтобусаў.

У Лапіцкім сельсавеце прайшло чарговае выязное пасяджэнне савета грамадскага пункта аховы правапарадку, на якое запрасілі 12 чалавек, схільных да асацыяльнага ладу жыцця. Месцам сустрэчы актавая зала Лапіцкай школы стала невыпадкова: напярэдадні канікул прысутныя на пасяджэнні першы намеснік — начальнік крымінальнай міліцыі Віктар Архіпенка і начальнік IСН РАУС Вячаслаў Яшкін правялі з навучэнцамі размову, накіраваную на прафілактыку супрацьпраўных паводзін.