IV раённы агляд-конкурс дзіцячых і маладзёжных творчых калектываў «Хваля збірае сяброў» адбыўся ў суботу ў Вяззі
Даўно не прымаў мясцовы Дом культуры столькі юных артыстаў. Спевакі і музыкі, танцоры і музыканты з’ехаліся з розных куткоў нашага і Бабруйскага раёнаў, каб прадэманстраваць сваё майстэрства на сцэне.
У конкурсе было вызначана 6 намінацый: за права называцца лепшымі спаборнічалі салісты, вакальныя дуэты, танцавальныя калектывы, вакальныя групы, музыкі, рамеснікі. Ацэньваючы выступленне, журы звяртала ўвагу на майстэрства і культуру выканання, мастацкую эстэтыку, рэпертуар і сцэнаграфію.
Праграму склалі амаль паўсотні нумароў. Па словах дырэктара цэнтралізаванай клубнай сістэмы раёна Алены Загароўскай, фестываль стаў яркім музычным святам. Самадзейныя артысты добра падрыхтаваліся, музычныя і танцавальныя кампазіцыі былі відовішчнымі, запамінальнымі.
Юныя таленты і госці агляду-конкурсу змаглі паўдзельнічаць у новай традыцыі — чырвонай дарожцы, неад’емным атрыбуце любога творчага форуму. “Далонькі” ўдзельнікаў конкурснай праграмы ўпрыгожылі эмблему фэсту. Былі і вясёлыя атракцыёны, клоўны і святочны кірмаш, выстава майстроў дэкаратыўна-прыкладнога мастацтва.
Нягледзячы на працягласць конкурснай праграмы, усе цярпліва чакалі, калі журы падсумуе вынікі. Шмат цёплых слоў сказала яго старшыня — намеснік начальніка аддзела ідэалагічнай работы, культуры і па справах моладзі райвыканкама Алена Бондарава — удзельнікам конкурсу, пажадала ім новых творчых дасягненняў, яркіх выступленняў на прэстыжных сцэнах. Усе канкурсанты атрымалі дыпломы.
Фота Наталлі МАРЦIНОВIЧ.
