Няпростай выдалася сёлетняя вясна для СВК “Калгас “Авангард”: напрыканцы сакавіка быў далучаны сельгаскааператыў “Карытнае”. Калі раней у “Авангардзе” налічвалася 5 тысяч гектараў угоддзяў, то лічба гэта на сёння падвоілася і толькі ворыўных земляў зараз тут 4.500 га. Сёння перад кіраўніцтвам ужо новай гаспадаркі стаіць задача рознабакова наладзіць эфектыўнае функцыянаванне ўзбуйненага сельгаспрадпрыемства. З чаго пачалася работа, якія чакаюцца перспектывы і адказаў старшыня Сяргей Сідарэнка.

— Нечаканасцю рашэнне аб аб’яднанні калгасаў не было, аднак і часу на тое, каб прамаруджваць з дзеяннямі, таксама не маем: зараз якраз перыяд, калі закладваецца ўраджай. Таму пачалі з новай карты палёў, вырашыўшы збожжавую групу “перадыслацыраваць” на Карытненшчыну, а плошчы з кармавымі культурамі ў асноўным размясціць на палетках былога “Авангарда” — бліжэй да аб’ектаў жывёлагадоўлі. Карытненцы спецыялізаваліся на вытворчасці насення траў, і гэты вопыт страчваць не збіраемся: пакінулі насеннікі ў іх поўных аб’ёмах — 450 гектараў злакавых, 200 — канюшыны. Цяпер наш элітгас пашырыць сваю сферу, прыплюсаваўшы да збожжавай групы і травы. Тым больш, што маем сучасную высокавытворчую лінію па ачыстцы насення, чые тэхнічныя характарыстыкі дазваляюць спраўляцца з большай нагрузкай.

— Як праходзіць сяўба ў новай гаспадарцы?

— Згодна з раённай зводкай, уступаем па тэмпах толькі філіялу “Белшына-агра” ААТ “Белшына”. Своечасова рыхтуецца ралля, уносяцца ўдабрэнні. Стараемся пусціць у справу і арганіку, якой у былым “Карытным” назапасіліся значныя аб’ёмы. На трактарах з сеялкамі ў асноўным заняты два механізатары — Алег Малевіч і Юрый Ахрэмчык. Арганізавана гарачае харчаванне. Словам, імкнемся, каб усе праводзімыя арганізацыйныя працэсы адмоўна не паўплывалі на ход палявых работ.

— Такі няпросты працэс, як аб’яднанне прадпрыемстваў, заўсёды мае і плюсы, і мінусы. Можаце канкрэтызаваць на прыкладзе “Авангарда”?

—Мяркую і спадзяюся, што ў далучаным кааператыве нічога не страцілі: ніхто не быў звольнены, акрамя жадаючых, зарплату выплацілі, памер яе не зменшыўся. Праўда, давялося спалучыць некаторыя пасады. Напрыклад, зараз адзін чалавек і аграном, і брыгадзір. Наладзілі выязны гандаль, і цяпер у нашай калгаснай краме працаўнікі, што жывуць у Карытным, могуць набываць прадукты ў тым ліку і ў кошт будучай зарплаты.

 Найбольшы ж мінус для “Авангарда” — крэдыторскія запазычанасці “Карытнага” па многіх рахунках, што значна ўскладняе рашэнне як бягучых, так і перспектыўных гаспадарчых задач. Прычым, лічбы немалыя. Пачалі з таго, што аддалі доўг каля двух мільярдаў рублёў гаспадаркам свайго раёна. Больш за мільярд павінны перад ААТ “Слуцкі цукроварафінадны камбінат”, таму сёлета салодкім караняплодам будзе адзведзена 300 гектараў — у два разы больш, чым летась.

— Як з жыллём?

— Маем два домікі ў Карытным. Канечне, будзем аддаваць перавагу сем’ям. Прыступілі да аднаўлення калгаснага жытла на дзве кватэры ў Лучыцах — на комплекс нам таксама патрабуюцца кадры.

— Змяненні ў жывёлагадоўлі чакаюцца?

— Збіраемся да зімы ўкамплектаваць комплекс у Карытным. З цягам часу, магчыма, узвядзём і яшчэ адно памяшканне. Пераводзім у летнія лагеры цялушак пад злучку. На сёння ў новым месцы “прапісалася” ўжо больш за 450 галоў, якія і дадуць пачатак новаму статку. Таксама перавезлі мясную жывёлу са зборскай фермы. У асноўным жа ў Карытным плануем развіваць малочны накірунак, вырошчваць цялушак.

Па-ранейшаму паўсюдна будзе надавацца значная ўвага якасці прадукцыі ферм. Напрыклад, зараз “Авангард” штодня здае перапрацоўшчыку каля 10 тон малака. Тлустасць вышэй за базісную дазваляе атрымліваць надбаўку, у выніку да сутачнага здабытку плюсуецца амаль тона. Згадзіцеся, гэта нямала.

— Пакуль прагнозы рабіць рана, аднак дапусцім, што развіццё гаспадаркі пойдзе па лепшым са сцэнарыяў…

— Нядаўна пабываў на Шклоўшчыне ў вядомым сельгаспрадпрыемстве “Александрыйскім” — на свае вочы ўбачыў, што можна стварыць высокатэхналагічную і эфектыўную гаспадарку са сваёй перапрацоўкай, якая дае якасную прадукцыю і прыносіць рэальны прыбытак. Канечне, трэба ўкласці нямала рэсурсаў — і матэрыяльных, і працоўных. Ведаем, што лёгка не будзе, аднак знаходзіць той, хто шукае. Таму будзем імкнуцца, каб два калгасы сталі адным дзеяздольным зладжаным калектывам, і кожны сезон даваў новы віток развіцця.

Гутарыла Валянціна КОРБАЛЬ.