Першыя рэчы, што знаходзяцца ў школьным музеі “Куфэрак мінуўшчыны” Дрычынскага ВПК дзіцячы сад-сярэдняя школа, прапісаліся ў 2007 годзе. Амаль за 10 гадоў існавання намаганнямі настаўнікаў, вучняў і мясцовых жыхароў сабрана ўжо звыш 280 прадметаў побыту, якімі карысталіся нашы продкі.

— Музейны пакой аформілі пад звычайную сялянскую хату пачатку ХХ стагоддзя, — гаворыць настаўнік гісторыі Аляксандр Гардзей. — Большая частка экспанатаў — тканыя, берасцяныя і вырабы з лазы. Асаблівую павагу маюць розныя па прызначэнні і выкананні ручнікі. Сярод унікальных знаходак — нацыянальныя строі дзяўчыны (доўгая вышытая сарочка, спадніца-андарак і фартух) і хлопца (кашуля, нагавіцы, пояс), якім больш за 100 гадоў. Этнаграфічная экспазіцыя пастаянна папаўняецца. І што ні экспанат, то гісторыя, якая дапамагае акунуцца ў атмасферу тагачаснага жыцця прабабуль і прадзедаў. Такія народныя скарбы павінны жыць, яны патрэбны сучаснай моладзі.

Ніна ВІКТОРЧЫК.