Дамы і кватэры 5.040 сем’яў жыхароў Асіповіччыны, у якіх выхоўваюцца дзеці да 18 гадоў, будуць абследаваны камісіямі да 20 мая на прадмет наяўнасці аўтаномных пажарных апавяшчальнікаў.

Дыплом I ступені ў абласным аглядзе-конкурсе рэгіянальных метадычных службаў і клубных сістэм Магілёўшчыны “Пошук. Творчасць. Поспех” атрымаў аддзел народнай творчасці і культурна-асветніцкай работы ДУК “ЦКС Асіповіцкага раёна” ў намінацыі “Лепшая метадычная служба”.

Новы від прадукцыі рыхтуецца прадставіць у хуткім часе ААТ “Асіповіцкі хлебазавод”: на паліцах нашых прадуктовых магазінаў з’явяцца пернікі “Малочныя” і “Шакаладныя”. У гэтыя дні мясцовыя хлебапёкі заняты вытворчасцю прысмакаў да каталіцкага Вялікадня — плануецца выпекчы 2 тысячы кулічоў 6 найменняў, з якіх два новыя — кекс “Вясна-красна” і “Велікодны з арахісам”.

“Вырасту, стану банкірам” — гэты фотаконкурс, праведзены Нацбанкам РБ, стаў шчаслівым для 8-класніка СШ № 4, удзельніка народнага фотаклуба “Раніца” РЦК Дзяніса Ерашэвіча. Юнак — лідар у намінацыі “Мой любімы банк”, таксама заняў другое месца ў “Лепшым чорна-белым кадры”.

Добраўпарадкаванне тэрыторыі — асноўнае пытанне на парадку дня ў Свіслацкім сельсавеце. Падрыхтаваны дакументы на знос 3 безгаспадарчых пустуючых дамоў, знесена 420 метраў старой агароджы. З мэтай вызначэння фронту работ ажыццяўляецца  аб’езд могілак.

Сайт газеты “Асіповіцкі край” штомесяц наведвае больш за 9 тысяч чалавек. У студзені зафіксавана 9.968 гасцей інтэрнэт-рэсурсу “раёнкі”, у лютым — 9.269.

Дадатковы інфармацыйны выпуск “Радыё Магілёў” “Мясцовы час. Асіповічы” выйдзе 28 сакавіка ў 17.30.

1.015 газавых воданагравальнікаў знаходзіцца ў шматкватэрным жылым фондзе Асіповіччыны, з якіх за люты-сакавік 997 абследавана працаўнікамі філіяла “Бабруйскае вытворчае ўпраўленне” РУП “Магілёўаблгаз”. Выдадзена 176 прадпісанняў на замену абсталявання і сістэмы дымавыдалення, адключана 72 калонкі, падключана 36.