Сур’ёзны доказ таго, што ў раёне турбуюцца пра здаровы лад жыцця, — перамога Асіповіч у штогадовым спаборніцтве сярод гарадоў і раёнаў Магілёўшчыны па развіцці фізічнай культуры, спорту і турызму. Мацнейшымі мы сталі ў другой групе — сярод раёнаў з колькасцю насельніцтва звыш 25 тысяч чалавек.

— Асіпаўчане рэгулярна прымаюць удзел у спаборніцтвах рознага ўзроўню па шэрагу відаў спорту, — расказвае намеснік начальніка РААСіТ Міхаіл Грыгорчык. — Зразумела, прыемна, калі займаем высокія месцы, але і ўвогуле любы вынік заўсёды каштоўны. Дарэчы, летась найбольш удала паказалі сябе нашы плыўцы (1 месца), весляры на байдарках і каноэ, удзельнікі зімняга мнагабор’я «Здароўе» (трэцяе) у межах абласной спартакіяды школьнікаў, а таксама баксёры (першае) і юнакі—баскетбалісты (другое) — на Алімпійскіх днях моладзі.

Не першы год існуе ў раёне і практыка перадачы юнакоў і дзяўчат, найбольш здольных да спорту, у вучылішчы алімпійскага рэзерву. У 2015 годзе ў Бабруйскае ВАР накіраваліся Максім Бортнік (бокс), Аліна Астаповіч і Мікіта Макарчык (лёгкая атлетыка), а футбалісты Максім Азараў, Аляксандр Лузан і Iлля Свірыдзенка — у спартвучылішчы Магілёва, Мінска і ФК “Шахцер” г. Салігорска. Кандыдатамі ў майстры спорту сталі плыўцы Максім Окрут і Раман Юрэня і байцы тай-боксу Ян Абрамчык і Максім Жук. А яшчэ шэраг землякоў уваходзіць у лік членаў, стажораў і рэзервіс-таў нацыянальных зборных па тайландскім боксе, плаванні і лёгкай атлетыцы.

Як адзначае Міхаіл Антонавіч, зараз фізкультурай і спортам актыўна займаюцца амаль 10 тысяч жыхароў Асіповіччыны — больш за 20% ад усёй колькасці насельніцтва. Працуюць з імі 118 трэнераў, інструктараў, настаўнікаў фізкультуры і г.д. Выдзяляемся мы і колькасцю аграсядзіб: 28 — адзін з вышэйшых паказчыкаў у вобласці.

Прыпыняцца на дасягнутым нельга, напры—клад, правядзём традыцыйны — ужо 34 — Асіповіцкі міжнародны марафон, чакаюць выступленні на раённай спартакіядзе па плаванні сярод арганізацый і кіруючых работнікаў, рэспубліканскім этапе “Залатой шайбы”, удзел ФК “Асіповічы” ў чэмпіянаце і шмат іншага, — адзначае ён. — У планах — не зніжаць тэмпаў развіцця, цесна супрацоўнічаць з працоўнымі калектывамі, рознымі аб’яднаннямі і арганізацыямі. З фізкультурай і спортам трэба сябраваць кожнаму!