Знаёмцеся:

начальнік разлікова-касавага цэнтра № 13 у г. Асіповічы

філіяла ААТ “Белаграпрамбанк” – Магілёўскае абласное ўпраўленне

Марат ЯНГАЛЫШАЎ

Нарадзіўся 24 чэрвеня 1974 г. у г. Горкі Магілёўскай вобласці. У 1991 годзе закончыў мясцовую школу з залатым медалём і працягнуў адукацыю ў Беларускай дзяржаўнай сельскагаспадарчай акадэміі. Атрымаў дыплом па спецыяльнасці “Эканоміка і кіраванне ў галіне АПК” з прысваеннем кваліфікацыі “Эканаміст-арганізатар сельскагаспадарчай вытворчасці”.

З мая 1996 па ліпень 2003 года працаваў у АСБ “Беларусбанк” у Горках: пачынаў з кантралёра-касіра аперацыйнага аддзела, а зволіўся з пасады галоўнага спецыяліста аддзела па рабоце з юрыдычнымі асобамі. У 2003-2006 гадах – аспірант кафедры аграбізнесу БДСГА, потым рабіў эканамістам крэдытнага аддзела аддзялення ААТ “Белаграпрамбанк” г. Горкі, праз паўгода стаў начальнікам РКЦ “Белаграпрамбанка” ў Дрыбіне. 6 студзеня прызначаны начальнікам Асіповіцкага філіяла.

– Чаму вырашыў пайсці ў эканамісты? Так склалася жыццё, – кажа Марат Шакіравіч. – Падзеі пачатку 90-х перамянілі ўсе папярэднія планы, таму падаў дакументы на самы прэстыжны ў той час эканомфак усесаюзнавядомай сельгасакадэміі.

У Асіповічы прыехаў “па размеркаванні”: з некалькіх прапанаваных месцаў выбраў гэты даволі вялікі і прыгожы горад. Розніцу адчуў адразу: калі ў Дрыбіне быў усяго тузін падначаленых, то тут – амаль паўсотні. Але калектыў зладжаны, прафесійны, з усімі заданнямі спраўляецца, таму пакуль што ніякіх праблем не ўзнікае. Акрамя таго, большасць раёнаў вобласці сельскагаспадарчыя, а Асіповіччына – прамысловы. Гэта адметнасць сур’ёзная: наш банк арыентаваны ў асноўным на аграпрамысловы комплекс, таму павінен мяняць звыклы стыль працы, нешта ўвогуле пачынаць з нуля. Але, спадзяюся, усё атрымаецца. Ужо паспеў пазнаёміцца з некаторымі старшынямі калгасаў – дамовіліся аб узае-мавыгадным супрацоўніцтве.

Як лічыць Марат Шакіравіч, падначаленыя павінны быць кампетэнтнымі ў сваёй сферы, умець даць адказ на кожнае пытанне, звязанае з дзейнасцю, каб любы кліент, фізічная ці юрыдычная асоба, застаўся задаволены і ў наступны раз захацеў прыйсці менавіта ў гэты банк. Добра ведаць сваю справу – абавязак любога спецыяліста, а ААТ “Белаграпрамбанк” – сістэмаўтвараючы, інвесціруе сродкі ў шэраг рэспубліканскіх праграм, таму адказнасць на яго супрацоўніках немалая.

Што тычыцца свабоднага часу, то яго ў Янгалышава няшмат. Калі ж выдаецца, то з задавальненнем чытае гістарычныя раманы, часам, калі хоча цалкам «адключыцца», можа і іранічныя дэтэктывы з паліцы дастаць. Падабаецца і спорт. Раней ён і сам рэгулярна займаўся, цяпер не надта здароўе дазваляе. Хаця самае галоўнае ў жыцці банкіра – выхаванне дзяцей: 16-гадовага Iвана і 12-гадовых двайнят Даны і Стаса. Пакуль яны не ведаюць, кім стануць у жыцці, але бацька не вы-ключае, што пойдуць па яго эканамічных слядах.

Марыя ТАЛЕЙКА. Фота Ніны ЦАРЫК.