Усе міліцыянеры адназначна не любяць нарады, выпадаючыя на вечар пятніцы, суботу і нядзелю. Трэба тлумачыць, чаму? Асаблівымі “прыгодамі” адрозніваюцца дні, на якія запар даводзіцца некалькі выхадных: закуска заканчваецца ў дзень першы, а алкаголь мае месца быць і на чацвёрты…

Дзяжурства групы затрымання № 2 аддзела Дэпартамента аховы прыйшлося менавіта на вечар чацвёртага — апошняга — выхаднога. У 19.00 10 студзеня ў нарад заступілі міліцыянер-вадзіцель старшы сяржант Павел Гацман, міліцыянер-кінолаг сяржант Аляксандр Тузаў і службовы сабака Джэк — у такім складзе служаць больш за год.

Па тратуарах Рабоча-Сялянскай групамі і паасобку рухаліся пешаходы: іх прысутнасць у студзеньскім снегавым змроку выдавалі толькі прывідныя водбліскі святлоадбіваючых стужак, смайлікаў і сэрцайкаў. Нечакана ў святло фар трапіла постаць чалавека, які, выпісваючы вензелі, ішоў прама па праезнай частцы. На неахайнай вопратцы нічога, што нават прыблізна нагадвала б флікер, а гэта — артыкул 18.23 Адміністрацыйнага кодэкса… Спыніўшы патрульную машыну і паведаміўшы аб правапарушэнні ў ДАІ, Гацман і Тузаў выпусцілі Джэка з багажніка, у якім перавозіцца сабака, і паклікалі правапарушальніка. Той, хістаючыся, шматслоўна пажадаў міліцыянерам… Не, не прыемнага новага года, а адпраўляцца куды далей.

Пачуўшы, што яго затрымалі да прыбыцця Дзяржаўтаінспекцыі, хуліган з нечаканым для п’янага спрытам кінуўся бегчы. Тузаў з крыкам “Стой! Пускаю сабаку! Джэк, голас!” — за ім. У руцэ ўцекача, які інстынктыўна  азірнуўся на гучны брэх нямецкай аўчаркі, Аляксандр заўважыў нож. Дагнаўшы мужчыну, які красамоўна размахваў халоднай зброяй, сяржант ззаду схапіў яго за плечы і не адпускаў, пакуль не падаспеў напарнік: удваіх паклалі бандыта, які актыўна супраціўляўся і мацюкаўся, на зямлю і надзелі наручнікі. Уціхамірыўся ён толькі тады, калі ў сантыметры ад яго раз’юшанага твара спынілася ашчэраная сабачая морда…

Неўзабаве на месца здарэння прыбыла следча-аператыўная група РАУС, і пры асабістым даглядзе затрыманага ў яго быў выяўлены яшчэ адзін нож. Як высветлілася пазней, грамадзянін раней неаднаразова судзімы, у яго “паслужным спісе” забойства, нанясенне цяжкіх цялесных пашкоджанняў і іншыя сур’ёзныя злачынствы…

Супрацоўнікі Дэпартамента, якія затрымалі небяспечнага рэцыдывіста, прадстаўлены да заахвочвання, а службовы сабака ўжо атрымаў сваю ўзнагароду: міліцыянер-кінолаг, які паўтара года таму ўзяў на выхаванне месячнага шчанюка і выгадаваў з гуллівага пухнатага камячка сапраўднага ахоўніка — “мару” злачынцаў, пачаставаў Джэка раскошным святочным абедам. Усё правільна: ён хоць і дарослы міліцэйскі сабака, але смачнасці вельмі любіць…

Соф’я САВАЙТАН.