Асіповіцкая майстрыха – ў Туркменістане
Дні беларускай культуры прайшлі ў пачатку снежня ў Туркменістане. Тры прадстаўнікі нашай вобласці, у тым ліку майстар па вышыўцы і ткацтве з Асіповіччыны Валянціна Туркіна, прэзентавалі выстаўку вырабаў дэкаратыўна-прыкладнога мастацтва з усіх рэгіёнаў краіны. Акрамя гэтага, народныя ўмельцы правялі майстар-класы па салома- і лозапляценні, ткацтве.
Па словах Валянціны Анатольеўны, дэманстрацыя работ беларускіх майстроў уразіла гаспадароў. Асабліва зацікавіліся прадметамі з саломкі і лазы, якіх раней не даводзілася бачыць. Некаторыя ж арнаменты на беларускіх і туркменскіх узорах супадаюць, адрозніваюцца толькі назвы і тэхніка выканання.
Дэлегацыя вярнулася дамоў не з пустымі рукамі — кожны быў узнагароджаны дыпломамі абодвух міністэрстваў культуры за прафесіянальную дэманстрацыю вырабаў дэкаратыўна-прыкладнога мастацтва і актыўны ўдзел у нацыянальнай выстаўцы-кірмашы.