Ганаровымі граматамі Магілёўскага абласнога і раённага выканаўчых камітэтаў, камітэта па сельскай гаспадарцы і харчаванні аблвыканкама, узнагародамі абкама і райкама прафсаюза работнікаў АПК адзначана шматгадовая плённая праца дырэктара ВУП “Малочны полюс” Таццяны Жоравай у юбілейны для гэтага таленавітага кіраўніка дзень.

На прадпрыемстве, якое зараз з’яўляецца адной з галаўных пляцовак ААТ “Бабушкина крынка” — кіруючая кампанія холдынга “Магілёўская малочная кампанія “Бабушкина крынка”, Таццяна Паўлаўна працуе з самага яго заснавання, і яе асабісты ўклад у развіццё вытворчасці значны. Узяць хаця б бягучы год: у верасні запушчаны ўчастак па выпуску сухой дэмінералізаванай сыроваткі метадам электрадыялізу, зараз вядзецца мантаж новага абсталявання па перапрацоўцы малака. Яго магутнасць — 30 тон сыравіны ў гадзіну. Асіповіцкі сыр “Рамбер” у кастрычніку адзначаны залатым медалём на XVII Расійскай аграпрамысловай выстаўцы “Залатая восень-2015” у Маскве, а нядаўна стала вядома, што сыркі глазураваныя “Веселые внучата” сталі пераможцамі прэміі спажывецкага прызнання “Народная марка”. Дарэчы, калі браць толькі гэтыя віды прадукцыі, то за студзень-кастрычнік выраблена і рэалізавана 1.759 тон паўцвёрдых сыроў — 423% да леташніх паказчыкаў, 914 тон сыркоў — 193,2%.

Таццяна Паўлаўна лічыць дасягнутае агульнай заслугай калектыву, які не баіцца ніякіх вытворчых цяжкасцей. “Усё ў нас атрымаецца!” — менавіта такое перакананне кіраўніка не раз падбадзёрвала на нялёгкім шляху да перамог. Сёння на прадпрыемстве нямала кадраў з вялікім стажам работы, хапае моладзі. Вось на гэты сплаў вопыту і задору і ўскладаюцца надзеі.