Асіповіцкая моладзь: ёсць ідэя!
Мабыць, ужо ўсе і неаднойчы чулі пра «100 ідэй для Беларусі» — праект, арганізаваны Беларускім саюзам моладзі. Маладым наватарам прапанавалася прыдумаць нешта новае ў розных сферах жыцця: культура, ахова здароўя, адукацыя, экалогія, будаўніцтва і іншае. Канечне, праект больш накіраваны на студэнцкую моладзь, але і вучні школ імкнуцца не адставаць. Напрыклад, сёлета 3 работы-ідэі мясцовых школьнікаў апынуліся на стале ў райкаме БРСМ.
«Догляд за хатнімі жывёламі як заробак» — вось сутнасць працы вучняў СШ № 4. Гэты бізнес найперш разлічаны на вельмі занятых і забяспечаных людзей і адносна свабодных школьнікаў і студэнтаў. Прапануецца стварыць міні-фірму і аказваць паслугі па выгулу хатніх жывёл, іх кармленні, дрэсіроўцы і інш. Як лічаць вучні, некаторыя сапраўды могуць на гэтым зарабіць мінімум на кішэнныя расходы.
Школьнікі з СШ № 3 вырашылі распрацаваць метад плантацыйнага вырошчвання буякоў. Прычым прапануюць рабіць гэта не толькі на асабістых падвор’ях, але і ў пітомніках лясгасаў. У апошні час узгаданыя смачныя і карысныя ягады адчуваюць на сабе даволі моцнае негатыўнае ўздзеянне прыроды і чалавека, таму трэба ім крыху «дапамагчы». Навучэнцы нават далі эканамічную адзнаку рэнтабельнасці праекта і вырашылі, што вырошчваць буякі такім метадам — выгадна.
Гімназісты ж прапанавалі на суд журы ідэю «Як павялічыць ККД электрачайніка?». Маладыя людзі распрацавалі шэраг мер па зніжэнні ўжывання электраэнергіі гэтым прыборам і прыйшлі да высновы, што калі імі карыстацца, можна значна зменшыць рахунак «за свет».
Было вырашана, што на абласны конкурс адправяцца 10-класніцы з СШ № 3 Юлія Курс і Вікторыя Трэцякова з ідэяй «Плантацыйнае вырошчванне буякоў» (навуковы кіраўнік — Святлана Зайцава).
