16 кастрычніка Цэнтрвыбаркам Беларусі зацвердзіў канчатковыя вынікі выбараў Прэзідэнта. Яны сведчаць аб тым, што на вышэйшую дзяржаўную пасаду выбраны Аляксандр Лукашэнка, за кандыдатуру якога аддадзена 5.102.478 галасоў выбаршчыкаў. Гэта склала 83,5% — больш за палавіну грамадзян краіны, якія прынялі ўдзел у галасаванні.

За Сяргея Гайдукевіча прагаласавала 201.945 галасоў (3,3%), Таццяна Караткевіч набрала 271.426 галасоў (4,4%), Мікалай Улаховіч — 102.131 (1,7%). Супраць усіх кандыдатаў прагаласавала амаль 386,2 тыс. чалавек (6,3%), а каля 48,8 тыс. бюлетэняў пры-знаны несапраўднымі.

«На падставе выкладзенага і ў адпаведнасці з арт. 82 Канстытуцыі Рэспублікі Беларусь, арт. 79 Выбарчага кодэкса Рэспублікі Беларусь Цэнтральная камісія Рэспублікі Беларусь па выбарах і правядзенні рэспубліканскіх рэферэндумаў пастанаўляе: першае — прызнаць, што выбары Прэзідэнта адбыліся, другое — лічыць выбраным на пасаду Прэзідэнта Рэспублікі Беларусь Лукашэнку Аляксандра Рыгоравіча», — заявіў сакратар Цэнтрвыбаркама Мікалай Лазавік пасля аб’яўлення канчатковых вынікаў выбараў.

Агульная колькасць  выбаршчыкаў па Рэспубліцы Беларусь склала 7.008.682, а бюлетэні для галасавання атрымала 6.115.690 чалавек. «У адпаведнасці з часткай трэцяй артыкула 79 Выбарчага кодэкса Рэспублікі Беларусь прызнана, што выбары адбыліся, паколькі ў галасаванні прыняло ўдзел 6.113.013 выбаршчыкаў — 87,2% ад агульнай колькасці выбаршчыкаў», — адзначаюць у Цэнтрвыбаркаме.

Пасля прыняцця рашэння па выніках выбараў старшыня ЦВК Лідзія Ярмошына не назвала дату інаўгурацыі. Яна растлумачыла, што гэтым пытаннем будзе займацца адпаведнае ўпраўленне Адміністрацыі Прэзідэнта Беларусі.

* * *

Старшыня ЦВК растлумачыла, што парламенцкія выбары, верагодней за ўсё, пройдуць у верасні 2016 года. Падрыхтоўку да іх Цэнтрвыбаркам пачне адразу, як толькі завершыць работу, звязаную з праведзенымі прэзідэнцкімі выбарамі.

* * *

Па словах старшыні Асі-повіцкай раённай камісіі па выбарах Прэзідэнта Рэспублікі Беларусь Васіля Пятроўскага, у нашым раёне ўдзел у выбарах прынялі 35.038 выбаршчыкаў. З іх 30.222 грамадзяніна (86,25%) падтрымалі Аляксандра Лукашэнку, за Сяргея Гайдукевіча прагаласавалі 640 чалавек (1,83%), за Таццяну Караткевіч — 2.150 (6,14%), за Мікалая Улаховіча — 345 (0,98%). Супраць усіх кандыдатаў выказаліся 1.377 жыхароў Асіповіччыны — 3,93%.