Асіповічы: коратка аб розным
“Паляванні княгіні Марыі Гагенлоэ ў Мінскай губерні ў 1889 годзе” — так называецца фотавыстава, якая адкрыецца сёння ў 17 гадзін у раённым гісторыка-краязнаўчым музеі з удзелам спецыялістаў замкавага комплексу “Мір”. Дарэчы, многія з паляванняў адбываліся на тэрыторыі сучаснага Асіповіцкага раёна. У калекцыі ёсць таксама групавыя здымкі паляўнічых, на якіх адлюстраваны мясцовыя жыхары.
13.697 тон цукровых буракоў здадзена на Асіповіцкі буракапрыёмны пункт Слуцкага цукроварафінаднага камбіната на працягу верасня, у тым ліку 3918 — нашымі сельгаспрадпрыемствамі.
264 фіта-санітарныя сертыфікаты на прадукцыю, якая адгружаецца за межы Беларусі, выдадзена за студзень-жнівень дзяржрайінспекцыяй па насенняводству, каранціну і ахове раслін. Найбольш часта даследуецца драўніна і прадукцыя вытворчага ўчастка ААТ “Бабруйскі КХП”.
Каля 100 наведвальнікаў прымае штодня аддзяленне прафілактыкі райпаліклінікі. Нярэдка ў час прафаглядаў выяўляюцца такія захворванні, як артэрыяльная гіпертэнзія, цукровы дыябет, глаўкома і іншыя.
Не гатовы пакуль землякі адмовіцца ад уласнага аўто нават на адзін дзень — такі вывад можна зрабіць з прымеркаванага да Сусветнага дня без аўтамабіля апытання, праведзенага ў сацыяльных сетках “раёнкай”. Цікава, што найбольшую актыўнасць праявілі тыя, хто не мае свайго транспартнага сродку.
209 гектараў невыкарыстоўваемых зямель выяўлена сёлета землеўпарадкавальнай службай раёна ў сельскіх населеных пунктах Асіповіччыны. Участкі перададзены сельгаспрадпрыемствам для ўключэння іх у гаспадарчы абарот.
Па паведамленні аддзялення па грамадзянстве і міграцыі РАУС, з 29 верасня па 2 кастрычніка ў раёне пройдзе спецыяльнае комплекснае мерапрыемства “Нелегал”. Яго мэта — супрацьдзеянне незаконнай міграцыі, аздараўленне крымінагеннай абстаноўкі, звязанай са знаходжаннем замежных грамадзян і асоб без грамадзянства на тэрыторыі Беларусі, прадухіленне з іх боку злачынстваў і правапарушэнняў.
