Сёння ў аграгарадку Ясень праходзіць свята працаўнікоў вёскі “Дажынкі-2015”
Сярод тых, каго выклікаюць на сцэну для ўзнагароджання, і працаўнік ААТ “Жорнаўка Агра” Яўгеній Чаропка. Ён — лідар маладзёжнага спаборніцтва, у час жніва намалаціў на ўмоўны камбайн 530 тон збожжа. I гэта перамога набывае асаблівае значэнне, бо адбылася ў Год моладзі, калі значная ўвага надаецца рознабаковаму пашырэнню магчымасцей маладых людзей, іх працоўнага патэнцыялу.
Жэня сам родам з Карытнага, пасля заканчэння школы вучыўся ў Асіповічах на электрагазазваршчыка. Атрымаўшы спецыяльнасць, уладкаваўся ў СВК “Калгас “Чырвоны ўдарнік”, як да нядаўняга часу і называлася гаспадарка.
За плячамі Чаропкі ўжо 5 сезонаў жніва, два з якіх ён быў старшым камбайнерам. Сёлета ўборка хлеба ў Жорнаўцы ішла 9 дзён, якія добра запомніліся хлопцу раннімі пад’ёмамі, познімі вяртаннямі з работы і новай адказнасцю, якая ляжыць у аснове права сесці за камбайн. Увогуле Яўген не шкадуе, што ён не механізатар — работа зваршчыка таксама падабаецца. Можа выконваць не толькі “цякучку”, але і дастаткова складаныя заданні. Ды і запатрабаваны спецыяліст круглы год. Праца поўным ходам ідзе і зараз: трэба рыхтаваць тэхніку, якая ўжо не будзе задзейнічана ў гэтым сезоне, да пастаноўкі на зімовы перыяд.
Шукаць лепшага месца хлопец не збіраецца. Маладой сям’і выдзелены добраўпарадкаваны дом, у гэтым жа сельгаспрадпрыемстве працуе ветурачом жонка, у Жорнаўцы нарадзіліся і падрастаюць маленькія сыны Глеб і Арцём. Застаецца толькі і далей шчыраваць, памнажаючы дабрабыт. Як свой уласны, так і гаспадаркі.
Валянціна КОРБАЛЬ. Фота Ніны ЦАРЫК.