Гэта толькі з першага погляду здаецца, што ўсе фермы аднолькавыя: вялікая пабудова з радам акон ды выгульнай пляцоўкай побач. Наведваючы ж аб’екты жывёлагадоўлі, пераконваешся, што кожная мае сваю атмасферу. І ствараюць яе, канечне, людзі.

На МТФ “Матавіла” СВК “Калгас “Ясень” працуе дружны калектыў — гэта адчуваецца адразу. З задавальненнем са-браліся ў чыстым і ўтульным пакоі для адпачынку, каб разам расказаць пра сваю работу.

— За апошнія тры гады ніхто не звольніўся, — канстатуе загадчыца Ірына Навіцкая, — значыць, землякам тут падабаецца працаваць, хоць лёгкай нашу работу, безумоўна, не назавеш. На ферме тры даяркі, адна з якіх падменная, жывёлавод, слесар па абслугоўванні малочнага абсталявання, дзённы дзяжурны і начны вартаўнік. Зараз утрымліваецца жывёлы больш за 100 галоў. Цялушак у Матавіла пастаўляе комплекс з Заельніка. Цяляты знаходзяцца на ферме на працягу трох тыдняў, а потым іх забіраюць у Ясень. Так што, можна сказаць, ферма спецыялізуецца толькі на вытворчасці малака.

На работу працаўнікі дабіраюцца з розных бліжэйшых вёсак: загадчыца з аператарам машыннага даення Наталляй Міхалап — з Асяродка, Таццяна і Віктар Корсак прыязджаюць з Заель-ніка. З самога Матавіла Леанід Суравец, які, можна сказаць, з’яўляецца на ферме аксакалам — робіць тут ужо тры дзесяцігоддзі. Ён добра памятае, наколькі стала зручней працаваць, калі 7 гадоў назад была ўстаноўлена даільная сістэма. Шкада толькі, што памеры памяшкання не дазваляюць прайсці трактару, яшчэ і цяпер даводзіцца раздаваць кармы рагулям уручную з воза.

Ёсць на ферме на каго раўняцца. Так, напрыклад, за паўгоддзе Навіцкая надаіла па 2.544 кілаграмы ад каровы, а Корсак — 2.443. І ў адной, і ў другой лічбы вышэй за сярэднераённы паказчык.

Важна ў рабоце як захаванне тэхналагічнасці, так і працоўная дысцыпліна. І першае, і другое на ферме ў Матаві-ла забяспечана. Ну а на цяжкасці, звязаныя з раннімі пад’ёмамі ды “разарваным” рабочым днём, даўно ўжо навучыліся не звяртаць увагі: такую ўжо асаблівасць мае работа на ферме. Галоўнае, каб намаганні прыводзілі да добрых вынікаў.