Андрэй Лазоўскі вучыцца ў Брэсцкім чыгуначным каледжы, праз год атрымае дыплом па спецыяльнасці «тэхнічная эксплуатацыя пагрузачна-разгрузачных пуцявых дарожна-будаўнічых машын і абсталявання». Але і сёння ён мае правы машыніста ПМГ і іншых выправачна-рыхтовачных машын, і нават снегаўборачнай можа кіраваць.

На чыгунцы хлопец працуе каля 7 гадоў. Спачатку праходзіў навучанне, затым стаў машыністам, а нядаўна быў назначаны началь-нікам пуцявой машыны ВПРС-03, якую ўласнаручна прыгнаў з Расіі. Яна прызначана для выпраўкі чыгуначнага пуці ўздоўж і папярок, а таксама пашчыльнення баласту пад шпаламі і стрэлкавымі пераводамі. Выкарыстоўваецца пры будаўнічых і рамонт-ных работах.

Транспартны сродак Андрэя не зусім звычайны. Ён адзіны на ўсё Магілёўскае аддзяленне, а таму экіпаж з чатырох чалавек часта накіроўваецца ў суседнія, Бабруйскую, Магілёўскую ды Крычаўскую ды-станцыі для правядзення там адпаведных работ. Для гэтага рыхтуецца спецыяльна тэхналагічнае “акно”, на некалькі гадзін перакрываецца рух саставаў, каб можна было бяспечна выканаць неабходныя маніпуляцыі. Працуе брыгада ў асноўным на станцыях, дзе найбольш складана адрыхтаваць стрэлкавыя пераводы, выязджаюць і на перагоны, па ўсіх напрамках руху цягнікоў. Работы вядуць у цесным узаемадзеянні з брыгадамі пуцейцаў.

Мясціны нашы для Андрэя не новыя. Вырас на Клічаўшчыне, таму калі едзе на Стаялава — гэты адрэзак абслугоўвае мясцовая дыстанцыя пуці — праязджае тэрыторыю, дзе праходзіла дзяцінства. Дарэчы, абодва дзядулі хлопца таксама працавалі на чыгунцы.

А напярэдадні прафесійнага свята Андрэй Лазоўскі прымаў віншаванні яшчэ з адной нагоды: ён стварыў уласную сям’ю, таму гэтыя летнія дні для чыгуначніка напоўнены толькі станоўчымі эмоцыямі.

Кацярына Іванова. Фота Ніны Царык.