На сустрэчы ў Магілёве

У сераду ў абласным цэнтры прайшоў семінар з удзелам старшыні Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў Лідзіі Ярмошынай. Запрашаліся на навучальны форум старшыні, намеснікі і сакратары тэрытарыяльных камісій па выбарах Прэзідэнта Рэспублікі Беларусь, прадстаўнікі мясцовых выканаўчых і распараджальных органаў, СМI вобласці.

Галоўная задача, якая была пастаўлена кіраўніком Цэнтрвыбаркама перад сваім актывам, — узмацненне прынцыпу галоснасці ў рабоце тэрытарыяльных выбарчых камісій. Канкрэтызавала яна і шляхі, якім чынам гэта можна ажыццявіць. Асаблівая ўвага была звернута на новаўвядзенні ў рамках работы назіральнікаў, на такі аспект, як наяўнасць у іх акрэдытацыі.

Было падкрэслена, што важная складаемая выбарчай кампаніі — стварэнне ўмоў для галасавання, у тым ліку для асоб з абмежаванымі фізічнымі магчымасцямі.

Старшыня Цэнтрвыбаркама таксама паведаміла, што збор подпісаў у падтрымку патэнцыяльных кандыдатаў у Прэзідэнты краіны праходзіць без парушэнняў.