Надышоў час убіраць вырашчанае і напаўняць засекі зернем новага ўраджаю. Пачатак уборкі — своеасаблівае свята, якое ў народзе называлася “зажынкі”. Раней яны адбываліся ў дзень Пракопія Жніўніка, 21 ліпеня. Лічылася, што дзякуючы праводзімаму абраду ніва становіцца ўрадлівай, а каласкі паспяваюць і робяцца больш важкімі. Вось і ў нашым раёне такое мерапрыемства прымеркавалі да гэтага дня.

“Зажынкі” прайшлі на полі філіяла “Белшына-агра” ААТ “Белшына”. Гэта адна з гаспадарак раёна, якая паспяхова спраўляецца з пастаўленымі задачамі, на палях якой, нягледзячы на не надта спрыяльныя ўмовы, даспявае нядрэнны ўраджай збажыны.

У вызначаны час выстраілі ў адзін рад сваю тэхніку камбайнеры, побач чакалі збожжа аўтамашыны.

Жніўнымі песнямі віталі ўсіх самадзейныя артысты з вязаўніцкай і каўгарскай устаноў культуры. Апошнія паказалі стылізаванае свята “Зажынкі”, у ходзе якога сярпамі зразалі першыя каласкі. Упрыгожаныя каляровымі стужкамі снапы былі ўручаны старшыні райвыканкама Пятру Шукаловічу, генеральнаму дырэктару ААТ “Белшына” Аляксею Якаўлеву і дырэктару філіяла “Белшына-агра” Аляксандру Баброву. Усе яны павіншавалі хлебаробаў з пачаткам важнай сельскагаспадарчай кампаніі і пажадалі працоўнага натхнення, добрага надвор’я і высокіх намалотаў.

Свежы каравай прымаў адзін з лепшых камбайнераў Валерый Ганчаронак.

Настаяцель Свята-Мікалаеўскага храма вёскі Свіслач Андрэй Клепча прачытаў малітву, асвяціў вадою камбайнераў і пажадаў божага благаславення і плёну ў рабоце.

Прыемна, калі праца хлебаробаў па-сапраўднаму ацэньваецца кіраўніцтвам. Усім 9 экіпажам, якія будуць шчыраваць на палетках, ад прафкама прадпрыемства былі ўручаны падарункі і букеты з палявых кветак і жытнёвых каласкоў.

Застракаталі камбайны, жняяркі сталі захопліваць спелае калоссе: звычайная для камбайнераў работа. Жніво-2015 распачалося!

Ніна ВІКТОРЧЫК. Фота Ніны ЦАРЫК.