Асіпаўчане ў Александрыі: з узнагародамі і пазітывам
У маштабным свяце “Александрыя збірае сяброў” у Шклоўскім раёне актыўны ўдзел прымалі і землякі. Каля 50 чалавек былі заняты ў культурных мерапрыемствах: выступалі народныя ансамблі народнай песні “Вяселле” Каўгарскага сельскага клуба і “Сваякі” Карытненскага СДК, плённа працавалі майстры дэкаратыўна-прыкладнога мастацтва раённага Цэнтра народных рамёстваў, яго дырэктар Валянціна Туркіна і кіраўнік студыі па ткацтве Вольга Наўдзюнас былі задзейнічаны ў вытворчасці самага доўгага ў Беларусі тканага пояса.
5 ліпеня на галоўнай сцэнічнай пляцоўцы прайшла цырымонія ўзнагароджання лепшых аграрыяў вобласці. Сярод перадавікоў былі і асіпаўчане. Дыпломамі ІІІ ступені і грашовымі прэміямі адзначаны філіял “Белшына-агра” ААТ “Белшына” і СВК “Калгас “Авангард”. Першае сельгаспрадпрыемства — за вытворчасць і продаж дзяржаве малака, другое — мяса. Разам з іншымі аператарамі машыннага даення, дасягнуўшымі найвышэйшых надояў ад каровы пры тлустасці малака не ніжэй за базісную, выклікаўся на сцэну “белшынавец” Аляксей Біцюн, а Жанна Ляшчун з СВК “Калгас “Новы шлях” была ў спісе лепшых тэхнікаў-асемянатараў.
Ганаровую грамату Мінсельгасхарчу атрымала аператар машыннага даення калгаса “Лапічы” Алена Гарадзецкая, а даярка Сняжана Жуковіч з “Белшыны-агра” і жывёлавод Ніна Трыбушэўская з “Авангарда” адзначаны грашовай прэміяй аблвыканкама і Ганаровай граматай Магілёўскага абласнога камітэта прафсаюза работнікаў АПК.
