На нарыхтоўцы кармоў сельгаспрадпрыемствамі раёна задзейнічана 23 касілкі і 20 кормаўборачных камбайнаў. Першым укосам скошана 3.695 га плошчаў — 41% да задання, прыбрана сена з 2.895 га — 79% да скошанага, нарыхтавана 255 тон сена і 14.634 — сенажу.

У ДРБУ-199 працягваюць займацца добраўпарадкаваннем дарог. З выкарыстаннем дарожна-рамонтнай машыны “Тайфун” на 650 “квадратах” дарожнага палатна праведзены ямачны рамонт, ад расліннасці вызвалены 200 км абочын і палос адводу. Штодня 15 работнікаў з дапамогай 2-3 трактароў абкошваюць каля 30 км.

Першы выязны фотаплэнер, арганізаваны кіраўніком народнага аматарскага фотаклуба “Раніца” РЦК Аленай Ерашэвіч, пройдзе заўтра ў жывапісным наваколлі вёскі Вязаўніца. “Спыніць імгненні” лета ў прыгожых здымках, абмяняцца вопытам і проста адпачыць на ўлонні прыроды адправяцца 20 членаў клуба, прафесіяналы і аматары фатаграфіі і іх мадэлі.

У Дараганаўскай участковай бальніцы з 1 чэрвеня павялічылася колькасць ложкаў сястрынскага догляду: да 25 месцаў у аддзяленні сястрынскага догляду дадалося 10 у стацыянары. Усяго сёлета ў бальніцы атрымалі кваліфікаваную меддапамогу 194 вяскоўцы і 163 жыхары райцэнтра,  сацыяльныя ложкі выкарыстаў 51 чалавек.

У раённым фізкультурна-аздараўленчым клубе “Алімпія” прыхільнікі актыўнага летняга адпачынку ў горадзе могуць узяць напракат ролікавыя канькі і скейтборды, да паслуг турыстаў 3-месныя палаткі, спальныя мяшкі і байдаркі, якія становяцца ўсё папулярней сярод жыхароў Асіповіччыны. Цэны на пракат інвентару дэмакратычныя: ад 15 да 80 тысяч рублёў.

У Градзянскім сельсавеце на 2,9 га скошана трава, ачышчана ад хмызняку 1.990 м2 тэрыторыі, знесена  1.390 м старых агароджаў, ліквідавана 29 несанкцыянаваных звалак смецця, выраўнавана грэйдарам 2,5 км дарог і на 2,8 км выраблены ямачны рамонт. Па выніках абследавання 513 домаўладанняў выдадзена 158 прадпісанняў, 144 з якіх ужо выкананы. Складзена 2 адміністрацыйныя пратаколы. На чарговае пасяджэнне АПАП, якое тут пройдзе сёння, запрошана для разгляду 8 чалавек.