Як зрабіць прадугледжанае гадавым планам мерапрыемства яркім і запамінальным, ведаюць кіраўніцтва райарганізацыі Беларускага прафсаюза работнікаў адукацыі і навукі і члены прафсаюзных “пярвічак” устаноў адукацыі. У гэтым можна было пераканацца на педагагічнай сустрэчы, прысвечанай 70-годдзю Вялікай Перамогі, куды запрашаліся ўдзельнікі вайны і працоўнага фронту, малалетнія вязні канцэнтрацыйных лагераў і дзеці вайны — ім у першую чаргу і была надзелена ўвага.

Намеснік старшыні райвыканкама Аляксандр Шаўлюга павіншаваў усіх са святам Перамогі, асобна падзякаваў прадстаўнікам сталага пакалення за тое, што некалі адстаялі свабоду, нанова адрадзілі з руін краіну і яе эканоміку.  Падзячныя лісты старшыні райвыканкама ён уручыў Валянціне Гаўрылаўне Галынскай, Віктару Аляксандравічу Аўгусцінусу і Міхаілу Паўлавічу Падвойскаму.

Працягнула віншаванні начальнік аддзела адукацыі, спорту і турызму райвыканкама Наталля Шаўчэнка. “Вы расквецілі свет у розныя колеры, каб ён стаў прыгожым і ім маглі любавацца будучыя пакаленні, — такое меркаванне выказала яна ў час свайго выступлення, звяртаючыся да ўбеленых сівізной педагогаў. — Няхай вясна сённяшняй моладзі стане вашай бесклапотнай і ўтульнай восенню”.

Паўтара дзясятка ветэранаў педагагічнай працы атрымалі Падзякі аддзела адукацыі, спорту і турызму райвыканкама і райкама прафсаюза за значны ўклад у развіццё сістэмы адукацыі раёна.

Да свята Перамогі быў прымеркаваны прафсаюзны конкурс мастацкай самадзейнасці, у якім удзельнічалі ўсе ўстановы адукацыі. Гала-канцэрт склалі песні салістаў, дуэтаў і вакальных груп, выступленні танцавальных калектываў, мастацкае чытанне вершаваных твораў — нумары былі самымі разнастайнымі. Аб’ядноў-вала ж іх не толькі ваенная тэматыка, але і шчырасць выканання, укладзеныя ўнутраныя перажыванні. I больш за пяцьдзясят удзельнікаў фестывалю  самадзейнай творчасці педагогаў “Гэты Дзень Перамогі” былі адзначаны дыпломамі і грашовымі падарункамі.

Старшыня раённай арганізацыі прафсаюза Алена Кулакоўская, падводзячы вынікі,  адзначыла, што 9 Мая заўсёды застаецца сімвалам гонару за нашых слаўных продкаў, таму было вельмі важна, каб і мерапрыемства прайшло на высокім узроўні. Так і атрымалася.

Валянціна КОРБАЛЬ. Фота Ніны ЦАРЫК.