“Прывітанне! – Hello!»

Знаёмства з іншай культурай заўсёды цікава і прывабна. Асабліва для дзяцей, якія ахвотна вывучаюць усе незнаёмае. Зусім нядаўна асіповіцкім школьнікам выпала магчымасць сустрэцца з жыхарамі туманнага Альбіёна: да нас завіталі 4 прадстаўнікі камітэта Брысталь брытанскай дабрачыннай арганізацыі «Лінія жыцця дзецям Чарнобыля». Гэты камітэт на працягу шэрагу гадоў запрашае на аздараўленне асіповіцкіх вучняў і аказвае значную матэрыяльную дапамогу Пратасевіцкай школе.

Акрамя знаёмства з краінай, горадам і Пратасевічамі, старшыня камітэта Брыстоль дабрачыннай арганізацыі Эндзі Марч, члены камітэта Эндрю Сміт, Моллі Кокс і Лорэйн Морган  мелі на мэце сустрэчу з дзецьмі, якіх прымалі ў сябе раней. Адразу завіталі ў СШ №3. Тэма сумеснага ўрока вучняў 8 “А” і 10 “А” класаў і англічан гучала так: «Маладзёжныя арганізацыі ў Беларусі і Вялікабрытаніі». Землякі расказалі гасцям пра піянерыю і саюз моладзі, а тыя, у сваю чаргу, зацікавілі хлопцаў і дзяўчат аповедам пра скаутаў. Вучні школы, якія пабывалі ў Брысталі, з задавальненнем успомнілі свой адпачынак, а тыя, хто толькі рыхтуецца да паездкі, мелі магчымасць задаць пытанні гасцям.

– Канечне, падлеткі аднесліся да прыезду замежных гасцей з цікавасцю, – адзначае настаўнік англійскай мовы СШ №3 Валянціна Чаропка. –  А яшчэ падчас сустрэчы мы змаглі праверыць узровень падрыхтоўкі сваіх вучняў. І прыемна, што яна, як адзначылі госці, аказалася даволі якасная.

Марыя ТАЛЕЙКА. Фота Ніны ЦАРЫК.