Каля паўсотні чыгуначнікаў і членаў іх сямей прынялі ўдзел у адборачным этапе фестывалю “Перамозе — слава!”, які прайшоў на базе Дома культуры Асіповічы Магілёўскага культурна-спартыўнага цэнтра. На суд журы было прадстаўлена больш за 2 дзясяткі вакальных і танцавальных нумароў. Пераможцаў чакае абласны тур.

На кансультацыйны прыём урачоў-спецыялістаў Віцебскага дзяржмедуніверсітэта, які быў нядаўна наладжаны ў райпаліклініцы, патрапіла каля дзвюх соцень землякоў. Найбольш запатрабаваным аказаўся эндакрынолаг, што і не дзіўна: зараз такога спецыяліста раён не мае. Гэты ўрач пракансультаваў 37 мужчын і жанчын.

Падведзены вынікі абласнога этапу рэспубліканскага маладзёжнага вакальнага конкурсу Федэрацыі прафсаюзаў “Новыя імёны Беларусі”. З 67 удзельнікаў было абрана 16, у ліку якіх і асіпаўчане Вераніка Кузьміч і Аляксандр Матвеёнак.

На піваварны ячмень робіць сёлета стаўку сялянска-фермерская гаспадарка “АграАўтаНова”. 750 гектараў пад названую культуру тут адведзена ўпершыню.

Купальныя касцюмы — асноўны від прадукцыі, які зараз выпускаецца на ПВУП “Відэлія”. За дзень асіповіцкімі майстрыхамі вырабляецца каля 250 камплектаў.

844,2 тоны ўмоўнага паліва сэканомлена раёнам за I квартал, а выкананне мэтавага паказчыка па энергазберажэнні пры заданні мінус 2 склала мінус 2,8. Значны ўклад у справу эканоміі энергарэсурсаў за кошт выканання розных мерапрыемстваў належыць УКВ ЖКГ, заводам жалезабетонных канструкцый і дахаваму «ТэхнаНIКОЛЬ».

281 прадпісанне аб навядзенні парадку і добраўпарадкаванні тэрыторыі выдадзена за сакавік-красавік Дараганаўскім сельвыканкамам жыхарам сельсавета і арганізацыям. Пераважная большасць недахопаў аператыўна ліквідавана.

Новая лінія пральных парашкоў SUNDAY распрацавана на парфумерна-касметычнай фабрыцы “Сонца”. Асаблівасць у тым, што яны не ўтрымліваюць фасфатаў і з’яўляюцца экалагічна бяспечнымі, раствараюцца нават у халоднай вадзе. Рэалізуецца пральны сродак ва ўпакоўках па 0,4 і па 2-3 кілаграмы.