Пасяджэнне савета грамадскага пункта аховы правапарадку ў Лапіцкім сельсавеце — справа звычайная: такія сустрэчы ладзяцца штомесяц, і ім надаецца значная ўвага. Аднак апошняе прафілактычнае мерапрыемства было адметным: разам з прадстаўнікамі раённай улады — старшынёй райсавета дэпутатаў Аляксандрам Пузікам, намеснікам старшыні райвыканкама Аляксандрам Шаўлюгам у ім прымалі ўдзел як галоўныя праваахоўнікі раёна — пракурор Аляксандр Канецкі, начальнік РАУС Уладзімір Рыжанкоў, — так і рэгіёна. У пракурора Магілёўскай вобласці Аляксандра Чадзюка і старшыні Камітэта дзяржкантролю вобласці Алега Садоўскага мэтай было яшчэ і правядзенне “прамой тэлефоннай лініі” і прыёму грамадзян.

Лапіцкі сельсавет — тэрыторыя няпростая: 28 населеных пунктаў, 2 школы, 4 дзіцячыя сады. Колькасць насельніцтва — 2.720 чалавек, з якіх 462 — дзеці. Нямала тут добрых сямей, але ёсць і праблемныя. Такім і была надзелена асаблівая ўвага на пасяджэнні. Запрашаліся бацькі са школьнікамі, якія здзейснілі розныя правапарушэнні. Характарыстыку вучням давалі педагогі. Адчувалася, што работа ў Лапіцкай і Жорнаўскай сярэдніх школах і з вучнямі, і з татамі-мамамі вядзецца мэтанакіраваная і рознабаковая. Ёсць прычыны меркаваць, што непаўналетнімі будуць асэнсаваны паводзіны і зроблены правільныя вывады.

Большую праблему складаюць дарослыя жыхары сельсавета, якія нідзе не працуюць, злоўжываюць спіртнымі напоямі. На ўліку такіх грамадзян 38. Больш за два дзясяткі з іх — абавязаныя асобы. Некаторыя патрапілі пад увагу савета грамадскага пункта аховы правапарадку і ў гэты дзень. Галоўнай жа мэтай прафілактычнага мерапрыемства было не проста паўшчуваць грамадзян за недастойныя паводзіны, а разам знайсці шляхі вырашэння існуючых праблем.

Дабрабыт сям’і ў многім залежыць ад наяўнасці сталага месца працы. У прынцыпе, якраз з гэтым асаблівых перашкод няма: два мясцовыя сельгаспрадпрыемствы заўсёды ідуць насустрач і гатовы ўзяць працаўнікоў. Хоць, шчыра кажучы, аматары спіртнога — а менавіта злоўжыванне “гарачымі” напоямі і ёсць корань зла — далёка не заўсёды добрасумленныя калгаснікі. Аднак як па-іншаму дапамагчы чалавеку? Вось і атрымліваецца, што ў некаторых працоўная кніжка па некалькі разоў за год папаўняецца запісамі аб прыняцці на работу і звальненні. Як падкрэсліў пракурор вобласці Аляксандр Чадзюк, у сельскай мясцовасці, як ні круці, усё ж прасцей паставіць чалавека на правільную дарогу, чым у горадзе: кожны навідавоку. I калі людзі, якія жывуць побач, не будуць абыякавымі, разам можна дасягнуць станоўчых выні-каў. I з гэтым меркаваннем цяжка не пагадзіцца.

Пабывалі прадстаўнікі вобласці ў гэты дзень і на сельгасаб’ектах — мехдвары ў Лапічах і малочнатаварнай ферме ў Папоўцы, таксама наведалі ААТ “Газпрам трансгаз Беларусь” філіял “Асіповіцкае ўпраўленне магістральных газаправодаў”.

Валянціна КОРБАЛЬ.