РАУС

У перыяд з 2 па 8 сакавіка выяўлена 4 факты парушэння антыалкагольнага заканадаўства, канфіскавана 20 літраў брагі і 1,5 — самагону. Выяўлены труп без прыкмет гвалтоўнай смерці. Устаноўлена месцазнаходжанне дзвюх асоб, якія знаходзіліся ў вышуку. У бальніцу з траўмамі рознай ступені цяжкасці дастаўлена 3 чалавекі. На вул. Юбілейнай затрыманы непрацуючы 21-гадовы асіпаўчанін з прыкметамі таксікалагічнага ап’янення. У в. Вяззе пры ўборцы прыдамавой тэрыторыі знойдзены снарад.

РАСК

Распачата 19 крымінальных спраў, з іх 10 — па фактах крадзяжу маёмасці, 6 — у дачыненні мінчанкі, што прадавала ювелірныя вырабы без адпаведных прабірных клеймаў.

2 млн рублёў зняў з выкрадзенай банкаўскай карты свайго калегі рабочы аднаго з прадпрыемстваў.

Пракуратурай заведзена справа супраць 29-гадовага мужчыны, які нанёс лёгкія цялесныя пашкоджанні сужыцельцы.

4 сакавіка памерла пасажырка, якая атрымала цяжкія траўмы ў ДТЗ, што здарылася 8 лютага каля пас. Ялізава.

Распачата крымінальная справа і ў дачыненні грамадзяніна, які набыў мабільны тэлефон, загадзя ведаючы, што той здабыты злачынным шляхам.

ДАI

Папярэджана 182 факты парушэння ПДР, да адказнасці прыцягнута 3 нецвярозыя вадзіцелі, 54 парушальнікі хуткаснага рэжыму, 22 пешаходы. Адбылося 9 ДТЗ.

АУСТ

Заведзена 4 крымінальныя справы, складзены 83 адміністрацыйныя пратаколы, суправоджана 99 цягнікоў, з якіх знята 9 правапарушальнікаў. Знойдзена 4 злачынцы, што знаходзіліся ў вышуку. У спецізалятар дастаўлена 3 грамадзяніны.

3 сакавіка ў дачным доме Бабруйскага раёна выяўлена і канфіскавана 26 кілаграмаў макавага насення. Гаспадар прыцягнуты да адміністрацыйнай адказнасці.

РАНС

5 сакавіка каля 5 гадзін раніцы пуцявым абходчыкам на ст. Асіповічы выяўлена струйная цеча салянай кіслаты з 50-тоннай транспартнай чыгуначнай цыстэрны. На месца пашкоджання ў раёне зварнога шва цыстэрны работнікамі пажарнага цягніка сумесна з супрацоўнікамі МНС накладзены бандаж. Забруджвання навакольнага асяроддзя не дапушчана, праз 4 гадзіны груз адпраўлены да месца прызначэння.

У выніку пажару, які адбыўся 6 чысла на тэрыторыі ГБК “Аўтааматар № 2”, знішчаны 1 і пашкоджаны 2 аўтамабілі, часткова разбурана бетонная сцяна паміж гаражамі і перакрыцце.

IАЖіРС

Складзены 2 пратаколы за парушэнне правілаў рыбалкі.