Зорны паход па месцах баявой і працоўнай славы беларускага народа, у рамках якога прыбыла 27 студзеня на Асіповіччыну міжнародная дэлегацыя, злучыўшая студэнтаў з чатырох краін — Беларусі, Расіі, Казахстана і Туркменістана, па ўсіх параметрах атрымаўся адметным. Ён тройчы юбілейны: 50-ы па ліку, прысвечаны 100-годдзю галоўнай педагагічнай ВНУ краіны — цяперашняга ўніверсітэта імя Максіма Танка, чые студэнты і склалі аснову дэлегацыі, а таксама 70-годдзю Вялікай Перамогі.

Урачыста-патрыятычны — такім можна назваць першы дзень знаходжання атрада “Маладая гвардыя” на Асіповіччыне. На мітынгу на Алеі Герояў сабраліся прадстаўнікі мясцовай улады, кіраўнікі грамадскіх аб’яднанняў, старшакласнікі з гарадскіх школ, ваенны духавы аркестр. Старшыня райарганізацыі Беларускага грамадскага аб’яднання ветэранаў Міхаіл Слесарэнка ў сваім выступленні падкрэсліў, што ў раёне беражліва захоўваецца памяць пра падзеі Вялікай Айчыннай вайны і яе герояў. Шкада, што зараз на Асіповіччыне засталося ўжо менш за сотню тых, хто прымаў непасрэдны ўдзел у абароне Радзімы. Дзякуй ім вялікі за кожны наш мірны дзень! Ад маладога пакалення, у сваю чаргу, прагучала абяцанне шанаваць здабыткі народа і памнажаць іх. Заключным акордам мітынгу стала ўскладанне вянкоў і кветак да абеліска.

Працягнулася сустрэча ў актавай зале СШ № 1. Вучні падрыхтавалі літаратурна-музычную кампазіцыю “Дзе правіць вайна, нікому спакою няма”. Вершы, песні, тэатралізаваныя пастаноўкі дапамаглі зрабіць вечар насычаным і інфармацыяй, і эмоцыямі. Малалетні вязень Анатоль Міхайлавіч Дольскі падзяліўся шчымлівымі ўспамінамі аб знаходжанні сям’і ў Нямеччыне, працягнуў размову на ваенную тэму старшыня раённай арганізацыі грамадскага аб’яднання “Беларускі Саюз ветэранаў вайны ў Афганістане” Юрый Корбан. Свае канцэртныя нумары прапанавалі не толькі вучні, але і госці. Кветкі, сувеніры, падарункі ветэранам ад РА ГА “Белая Русь”, шчырыя ўсмешкі і словы ўдзячнасці — усё ва ўтульны вечар мела месца. Разыходзіцца не спяшаліся, бо аб многім хацелася пагутарыць.

Насычанымі аказаліся і наступныя дні. У сераду дэлегацыя наведала СЗАТ “Шклозавод Ялізава”, робатызаваную ферму ў Вязычыне, ГЭС, комплексна-краязнаўчы музей у Дараганаўскім ВПК, а ўчора госці пабывалі ў раённым гісторыка-краязнаўчым музеі, надоўга затрымаліся ў СШ № 2, дзе прайшлі інтэрактыўныя заняткі ў музеі гісторыі школы, потым у “Равесніку” адбыліся прафарыентацыйная сустрэча і канцэртная праграма. Сёння ж студэнты з раніцы наведалі храм іконы Божай Маці “Жываносная крыніца” ў Прошчы, прынялі ўдзел у арт-акцыі “Краіне любімай нашы сэрцы” ў гімназіі. Словам, уражанняў — маса.

— Спадабалася Беларусь і добразычлівыя людзі, якія тут жывуць, — расказала адна з удзельніц паходу Салтанат Нургаліева, якая вучыцца ў Казахскім нацыянальным аграрным універсітэце. — Прыгожы і цікавы горад Асіповічы. Спадзяюся, яшчэ не раз атрымаецца пабываць у вашай сяброўскай краіне, палюбавацца бяскрайнімі лясамі.

 З задавальненнем падзяліўся меркаваннем аб наведванні Асіповіччыны і намеснік дэкана гістарычнага факультэта БДПУ імя М.Танка Уладзіслаў Кадзіра:

— Апошні раз быў з Зорным паходам у вашых мясцінах 7 гадоў назад. За гэты час адбылося шмат перамен да лепшага. Змяніліся як школы — па-сучаснаму абсталяваны кабінеты, актавыя залы, — так і дзеці, якія сталі праяўляць больш інтарэсу да гісторыі, роднага краю, непасрэдна да нашага паходу. Выдатная арганізацыя дазволіла шмат дзе пабываць і аб чым даведацца — вялікі дзякуй арганізатарам за гэтыя цікавыя і карысныя дні. Ну і, безумоўна, будзем рады бачыць вашых выпускнікоў у ліку нашых студэнтаў!

На здымку: момант перадачы раённаму гісторыка-краязнаўчаму музею карціны “Пад мірным небам” Анатолем Міхайлавічам Дольскім у час наведвання ўстановы ўдзельнікамі 50-га Зорнага паходу.