На мінулым тыдні, пры правядзенні работ па добраўпарадкаванні прылягаючай да аўтамабільнага моста цераз раку Сінюю, што знаходзіцца на ўездзе ў горад недалёка ад перакрыжавання вуліц Юбілейнай і Крыловіча, работнікі ДЭУ № 73 знайшлі ў прыбярэжным кустоўі рэшткі дзікоў — некалькі скур, фрагменты як мінімум 3 галоў і каля 20 капытоў.

Па інфармацыі, атрыманай ад следчых органаў, інспекцыі аховы жывёльнага і расліннага свету, раённай аргструктуры таварыства паляўнічых і рыбаловаў, ветэрынарнай службы, самыя старыя рэшткі дзікіх жывёл патрапілі ў рэчку не раней вясны гэтага года, апошнія — зусім нядаўна. Відавочна, непатрэбныя часткі паляўнічай здабычы выкідваліся з праязджаючых машын. Нягледзячы на блізкасць да горада, праз узгаданы мост праязджае адносна мала транспарту, таму знайсці зручны момант для “папаўнення” несанкцыянаванага могільніка нескладана…

Дакладную прававую характарыстыку гэтаму “рэчаваму доказу” пакуль даць нельга. Ён можа быць наступствам нахабнай браканьерскай дзейнасці альбо “знаходлівасці” паляўнічых, што элементарна ленаваліся выконваць правілы ўтылізацыі рэшткаў законна здабытай дзічыны. Аднак у любым выпадку той, хто зрабіў могільнік пад  мостам, з’яўляецца парушальнікам як правілаў палявання, так і прыродаахоўнага заканадаўства ў цэлым, таму што сваімі дзеяннямі забрудзіў водаахоўную зону.