Гудок, флажок — цягнік, павольна пагойдваючыся, адыходзіць ад перона, і ты апынаешся нібы ў асобным новым жыцці: акружаны чужымі людзьмі, гукамі, пахамі. Група маладых людзей п’е піва і гучна рагоча, нехта выйшаў у тамбур і атруціў паветра вагона тытунёвым дымам, падазронага выгляду мужычок цішком паглядае на нядбайна адстаўленую жаночую сумачку…

Словам, у цягніку, як і ў жыцці наогул, нас падпільноўвае нямала непрыемнасцей і небяспекі. Пра што не дае забыцца і металічны голас з дынамікаў: “Паважаныя пасажыры! Знаходзячыся ў цягніку, не пакідайце свае рэчы без нагляду, не давярайце іх незнаёмым асобам…”

Хто можа зрабіць паездку бяспечнай ці ўсё ж “выратаванне тапельцаў — справа рук саміх тапельцаў”, і дапамогі чакаць не даводзіцца? Распавядае начальнік аддзялення аховы правапарадку і прафілактыкі АУСТ Уладзімір СЛЕСАРЭНКА:

— Забеспячэнне бяспекі пасажыраў і членаў чыгуначных брыгад і прафілактыка правапарушэнняў у цягніках — наша паўсядзённая работа, таму супрацоўнікі АУСТ штодня суправаджаюць цягнікі рэгіянальных і міжрэгіянальных ліній. Яшчэ больш эфектыўная мера — рэгулярнае правядзенне спецыяльнай аперацыі “Пасажыр”, падчас якой ва ўзаемадзеянні з падраздзяленнямі АМАП УУС Магілёўскай вобласці, вайскоўцамі в/ч 5527 г. Бабруйска, дружыннікамі за суткі суправаджаецца каля 40 цягнікоў і прадухіляецца ў сярэднім 10-15 правапарушэнняў. Падчас правядзення аперацыі “Пасажыр” групы суправаджэння, у якіх задзейнічаецца 35-40 чалавек, здзяйсняюць не менш за 4 рэйсы ў цягніках Слуцкага, Магілёўскага, Мінскага напрамкаў. Кожную раніцу ў дзяжурнай часці АУСТ аналізуюцца справаздачы і карэкціруецца выбар цягнікоў, якія патрабуюць найбольш пільнай увагі. Напрыклад, апошнюю электрычку, што прыбывае са сталіцы ў гадзіну ночы, штодня суправаджаюць супрацоўнікі крымінальнага вышуку.

[tip]У перыяд правядзення аперацыі “Пасажыр” з 18 па 22 лістапада суправоджана 206 цягнікоў, прадухілена 65 правапарушэнняў, устаноўлена месцазнаходжанне прапаўшага без вестак жыхара Гомеля, затрымана 3 асобы, што знаходзіліся ў вышуку.[/tip]

Працягвае інспектар па ахове грамадскага парадку Віктар Кетурко:

— Колькасць правапарушэнняў у цягніках на працягу года прыкладна аднолькавая, але вясной і ўвосень з-за прытоку пасажыраў-дачнікаў і студэнтаў ёсць некаторы рост. Групы суправаджэння праходзяць па саставу па 5-6 разоў, бо нават вы-гляд чалавека ў міліцэйскай форме можа прадухіліць магчымае правапарушэнне: распіццё спіртных напояў, курэнне, дробнае хуліганства. Дарэчы, пасажыры ўспрымаюць наша з’яўленне ў вагоне вельмі станоўча, часта звяртаюцца з прапановамі ці за інфармацыяй, часам зусім нечаканага характару. Але ж і канфлікты непазбежныя. У любой сітуацыі стараемся паводзіць сябе ветліва і добразычліва: бяспека і спакой на транспарце — галоўная задача.

Алена ЛЕПЛЯНІНА-КУБАР.