Пра тое, што Беларуская чыгунка скарачае колькасць цягнікоў, якія спыняюцца на станцыі Ялізава, і пра рэакцыю на “транспартную аптымізацыю” мясцовых жыхароў “раёнка” паведамляла яшчэ ў чэрвені (“У цэнтр за інфармацыяй” — “АК” № 48 ад 27.06.2014).

Тады зразумелую незадаволенасць выклікала адмена прыпынку цягніка Магілёў-Мінск, на якім пасялкоўцам было найбольш зручна дабірацца да сталіцы і абласнога цэнтра. Аднак усе спробы адстаяць сваё права на якаснае транспартнае абслугоўванне скончыліся нічым. Па словах ялізаўчан, з Магілёўскага аддзялення чыгункі ў пасёлак накіравалі нейкага “паўадказнага таварыша”, які аргументы “тутэйшых” не слухаў, а толькі даказваў, што прыпыняцца гэты пасажырскі цягнік на станцыі ніяк не можа.

Карацей, цягнік № 659/660 як не спыняўся ў Ялізаве, так і не спыняецца.

З 10 студзеня 2015 года змяняецца яшчэ маршрут следавання цягніка Салігорск-Магілёў — будзе рушыць не праз пасёлак, а Бабруйск і Жлобін. Напэўна, выбар новага шляху ў дадзеным выпадку мае нейкую слушную прычыну, аднак крайнімі зноў застаюцца ялізаўчане. Яны змогуць карыстацца толькі дызель-цягнікамі, якія рушаць доўга, маюць вельмі ўмоўны камфорт, нязручны расклад і — галоўнае — з-за правядзення пуцявых работ даволі часта адмяняюцца. Мала дапамагаюць і рэйсавыя аўтобусы: яны днём праходзяць тут толькі двойчы ў тыдзень.

Каб прарваць “транспартную блакаду”, неабыякавыя ялізаўчане і жыхары прылягаючых да пасёлка вёсак зараз збіраюць подпісы пад калектыўнай скаргай, якую плануюць накіраваць начальніку РУП “Магілёўскае аддзяленне Беларускай чыгункі”. У гэтым лісце будзе зроблена спроба ў чарговы раз растлумачыць неабходнасць для жыхароў гэтай часткі Асіповіччыны зручнага і больш хуткага, чым цягнікі эканом-класа, чыгуначнага транспарту і зноў абгрунтаваць просьбу аднавіць прыпынак на станцыі міжрэгіянальнага цягніка Магілёў-Мінск.

Што атрымаецца з гэтай эпісталярнай “контр-атакі”, сказаць цяжка, аднак ялізаўскія жыхары маюць рашучы настрой. Бо лічаць, што чыгунка існуе для зручнасці людзей, а не наадварот. Не памыляюцца?

Дзмітрый САЎРЫЦКI.