РАУС

У перыяд з 17 па 23 лістапада ўстаноўлена месцазнаходжанне 5 асоб, якія знаходзіліся ў вышуку, раскрыта 3 крадзяжы, канфіскавана 60 літраў самагоннай брагі.

18 чысла ў в. Цэзарова знойдзены труп 45-гадовага мужчыны, на якім судмедэкспертызай папярэдне ўстаноўлены цялесныя пашкоджанні ў выглядзе пераломаў.

21 лістапада супрацоўнікамі АБЭЗ затрыманы жыхар Пухавіцкага раёна, які ў кузаве аўтамабіля “Форд-Транзіт” перавозіў металічныя дзверы без суправаджальных дакументаў. Прадукцыя на суму больш 21 млн руб. канфіскавана.

РАСК

Узбуджана 8 крымінальных спраў, у тым ліку па факце знікнення без  вестак жыхара в. Краснае, дзве тычацца крадзяжу каштоўнасцей і наяўных грошай з кватэр на агульную суму амаль 127 млн рублёў.

Нецвярозыя жыхары інтэрната прадпрыемства горада ў ноч на 19 лістапада высвятлялі адносіны з дапамогай нажа. У выніку адзін з цяжкімі цялеснымі пашкоджаннямі апынуўся ў бальніцы, а ў дачыненні другога распачата крымінальная справа.

92.265.200 і 34.700.000 рублёў — на такія сумы выкрадзена каштоўнасцей і наяўных грошай з кватэр, у якія злачынцы праніклі шляхам падбору ключа і правароту замка. Узбуджаны крымінальныя справы.

20 лістапада распачата справа ў адносінах да раней судзімага непрацуючага асіпаўчаніна, які незаконна захоўваў 0,829 г асабліва небяспечнага псіхатропнага рэчыва.

ДАI

Папярэджана 251 правапарушэнне, прыцягнута да адказнасці 3 нецвярозыя вадзіцелі, 55 “гоншчыкаў”, 29 пешаходаў. Адбылося 5 ДТЗ з матэрыяльнымі стратамі.

Увага! Да 27 лістапада праводзіцца рэспубліканская прафілактычная акцыя “Зрабі паездку бяспечнай”, па 4 снежня працягнецца спецаперацыя “Пешаход”. Адзіны дзень бяспекі дарожнага руху “Пешаход! Паважай пешаходны пераход” пройдзе ў пятніцу, 28 чысла.

АУСТ

Складзена 67 адміністрацыйных пратаколаў, суправоджана 122 цягнікі, з якіх знята 16 правапарушальнікаў, устаноўлена месцазнаходжанне 5 асоб, што знаходзіліся ў вышуку, у спецізалятар дастаўлена 4 чалавекі. Распачаты крымінальныя справы па фактах крадзяжу і незаконнага абароту зброі і боепрыпасаў.

Дэпартамент аховы

Спынена 4 дробныя крадзяжы і столькі ж спроб распівання спіртных напояў, 6 парушэнняў ПДР, дробнае хуліганства, затрымана самагоншчыца, раскрыта злачынства.

Спецізалятар

Размешчана для працверажэння 36 мужчын.

РАНС

19 лістапада на пажары дома па вул. Касмічнай загінуў пенсіянер.

Па вул. Паркавай у в. Ліпень у ноч на 23 лістапада агнём знішчаны будынак лазні, пашкоджаны дах і веранда жылога дома.

IАЖіРС

Складзена 5 пратаколаў па фактах парушэння правілаў лесакарыстання.