Адным з прыярытэтных напрамкаў развіцця канкрэтнага рэгіёна можна назваць турыстычны бізнес. Асіповіцкі край мае для гэтага ўсе ўмовы: маляўнічая прырода, невялікая аддаленасць ад сталіцы, цікавая гісторыя і, што самае галоўнае, душэўная цеплыня і хлебасольнасць, якія характэрны для ўсіх беларусаў.

Каб прыцягнуць увагу да турыстычных магчымасцей краіны, гэты год быў аб’яўлены Годам гасціннасці, і прыемна, што менавіта сёлета спіс аб’ектаў аграэкатурызму ў раёне папоўніўся. Зараз ён налічвае 21 аграсядзібу, дзе ўжо пабывала сёлета звыш трохсот чалавек, у тым ліку і замежныя грамадзяне.

Адной з апошніх і, напэўна, самых маштабных, прадстала перад гасцямі сядзіба з радаслоўнай “Краснае”. Узнікла яна на гістарычным месцы і ўяўляе ўзноўлены маёнтак памешчыкаў Незабытоўскіх, якія калісьці аблюбавалі прыгожы бераг Бярэзіны ў былой вёсцы Кассё і бавілі тут свой час удалечыні ад гарадской мітусні. Да нядаўняга часу ў будынку размяшчалася школа, дзе вучыліся мясцовыя і дзеці з навакольных вёсак, а ў апошнія гады  пуставаў. Новы гаспадар захаваў дзіўныя інтэр’еры ХIХ стагоддзя і арганічна дапоўніў сучаснымі элементамі, якія ўдала ўпісаліся ў агульную канву той эпохі. Такі крэатыўны падыход да стварэння незвычайнага загараднага комплексу для адпачынку выклікае да аўтара ідэі павагу і, думаецца, падштурхоўвае да падобных знаходак тых, хто гатоў да інвестыцый у такі від бізнесу, як турызм.

Ніна ВІКТОРЧЫК. Фота Дзмітрыя САЎРЫЦКАГА.