У раёне зарэгістравана больш за 560 індывідуальных прадпрымальнікаў. Віды дзейнасці, якім яны аддаюць перавагу, — гандаль, будаўніцтва, паслугі. З цягам часу гэтыя напрамкі могуць мяняцца, але колькасць IП апошнім часам застаецца пастаяннай: колькі ў месяц рэгіструецца, столькі і зварочваюць сваю дзейнасць.

Для будаўніцтва і абслугоўвання жылых дамоў усяго жыхарам Асіповіччыны прадастаўлена больш за 2.460 гектараў зямлі, з іх па гораду — амаль 430 га. Для вядзення асабістых падсобных гаспадарак выдзелена больш за 890, калектыўных садаводчых таварыстваў — амаль 307, для агародніцтва — болей чым 40 га, трэцяя частка з якіх знаходзіцца ў горадзе.

Лепшыя малаказдатчыкі ў нас — Iрына Карлоўская і Уладзімір Чыгілейчык з Вяззя. За студзень-верасень яны прадалі дзяржаве 17,5 і 11,5 тоны малака адпаведна. Не адстаюць і Юрый Казіміранка з Вялікай Гравы (15,2 тоны), Галіна Лебедзева з Краснага (10,4). Сёлета да перадавікоў далучылася і Святлана Белаушка з Лапіч, якая ўжо здала 8,9 т малака.

Да паслуг турыстаў у раёне прадастаўлена 2 гасцініцы, 2 дамы паляўнічага, Цэнтр народных рамёстваў, гісторыка-краязнаўчы музей, 24 помнікі гісторыі і культуры, 20 аграэкасядзіб.

Прыгарадныя аўтобусы курсіруюць па 38 маршрутах, у горадзе — па 15. Штодзённа на гарадскія лініі выходзяць 16 аўтобусаў, а дастаўляюць пасажыраў у райцэнтр і назад 8. Усяго ж у пасажыраперавозках задзейнічана 38 транспартных сродкаў аўтапарка, 3 з якіх набыта сёлета.

Абласны конкурс аматарскага мастацтва сярод грамадзян, якія пражываюць у дамах-інтэрнатах і аддзяленнях кругласутачнага знаходжання тэрытарыяльных цэнтраў сацыяльнага абслугоўвання насельніцтва, прайшоў у Магілёве. Асіпаўчанка Ліяна Крупіневіч выканала мілагучную песню «Лебедзь белы», падрыхтаваную разам з кіраўніком гуртка Вольгай Дрэнь. Спявачка была цёпла прынята гледачамі і атрымала памятны сувенір.

Па 31 кастрычнIка ў раёне праходзіць рэспубліканская пажарна-прафілактычная акцыя «За бяспеку разам» па папярэджанні пажараў і гібелі людзей ад іх у жылым фондзе ў асенне-зімовы пажаранебяспечны перыяд.

102 хлопчыкі і 25 дзяўчынак знаходзяцца на ўліку ў інспекцыі па справах непаўналетніх аддзела ўнутраных спраў райвыканкама, з іх 73 — вучні школ. Злачынствы сёлета здзейснілі 6 непаўналетніх, 4 падлеткі адпраўлены ў спецыяльныя вучэбныя ўстановы закрытага тыпу.

Самыя пажылыя людзі Магілёўскай вобласці пражываюць у нашым раёне: гэта 105-гадовая Любоў Iванаўна Вялічка з пасёлка Савецкі і жыхарка в. Дубавое Пратасевіцкага сельсавета Марыя Iванаўна Шалькевіч, якой сёлета споўнілася 106 гадоў.