У Асіповіцкім міжрайаддзеле дзяржкамітэта судовых экспертыз РБ працуе вядучы эксперт экспертна-крыміналістычнай дзейнасці і 2 старшыя эксперты. Сёлета імі праведзена 335 экспертыз: 250 дактыласкапічных, 85 — трасалагічных, 5 — почырказнаўчых і 15 даследаванняў нумарнога абазначэння транспартных сродкаў.

Раённы аддзел кінавідэаабслугоўвання запрашае на  прэм’еру: у выхадныя ў кінатэатрах горада будзе дэманстравацца новая кінастужка “Белыя росы. Вяртанне”, заснаваная на падзеях культавага фільма “Белыя росы”, які выйшаў на экраны ў 1983 годзе.

Мужам і жонкай за 9 месяцаў у раёне сталі 328 пар, з іх 277 зарэгістраваліся ў аддзеле ЗАГС райвыканкама. Рэкардсмен сярод сельвыканкамаў Лапіцкі: тут утварылася 9 новых сем’яў. Найбольшая колькасць жаніхоў (42) і нявест (33) ўступілі ў шлюб ва ўзросце ад 31 да 35 гадоў, 6 маладых не дасягнулі паўналецця, чацвёра землякоў абмяняліся пярсцёнкамі, перасягнуўшы 60-гадовую мяжу. Сярэдні ўзрост мужчын, якія зарэгістравалі адносіны, 30 гадоў, жанчын — 27.

У верасні прададзена 112.043 чыгуначныя квіткі, у тым ліку на цягнікі эканом-класа рэгіянальных ліній— 99.951, з якіх 49.558 — праз касу вакзала, на міжнародныя і міжрэгіянальныя — 11.982. На цягнікі, што ідуць ў далёкае замежжа, прададзены толькі 1 квіток.

Добраўпарадкаванне — прыярытэтны напрамак у рабоце Вяззеўскага сельвыканкама: у в. Вязье заасфальтавана 230 метраў вул.Гагарына, праведзена падсыпка 250 метрау праезду ад вул. Цэнтральнай да Паўднёвай. Высечана два аварыйныя дрэвы ў в. Цяплухі і столькі ж — на вяззеўскіх могілках. Бераг Свіслачы, што прылягае да тэрыторыі сельскага Дома культуры, ачышчаны ад расліннасці, а да самога СДК цяпер вядуць выкладзеныя пліткай прыступкі плошчай 7 “квадратаў”.

У райпаліклініцы ў рабочыя дні праводзіцца вакцынацыя супраць грыпу. З 8 да 12 і з 13 да 15 гадзін прымаюць у кабінеце № 113, з 15 да 18.30 — у кабінеце № 58.