У ходзе месячніка пажарнай бяспекі, які напярэдадні ацяпляльнага сезона на тэрыторыі Дрычынскага сельсавета правялі супрацоўнікі Асіповіцкага РАНС, было абследавана больш за 200 дамоў. У поле зроку трапілі інваліды I і II груп, шматдзетныя сем’і, грамадзяне, якія вядуць асацыяльны лад жыцця, адзінокія пажылыя людзі. У 9 гаспадароў выяўлены недахопы ў плане пажарнай бяспекі жылля, якія павінны быць выпраўлены ў бліжэйшы час.

У юрыдычную кансультацыю сёлета звярнулася больш за тысячу чалавек. Найчасцей прыходзяць людзі па прававую дапамогу з пытаннямі наконт жылля і выхавання дзяцей. Самыя складаныя справы звычайна тычацца права валодання і карыстання жылымі памяшканнямі.

Асіповіцкая ЦРБ прапануе тым, хто сёлета не прайшоў флюараграфію, прыйсці да пунктаў, дзе з 9.00 да 14.00 гадзін будзе знаходзіцца перасовачны флюарограф: 03.10 — магазін № 17 у «Чаромушках», 06.10 — раён трохвугольніка, 07.10 — магазін “Лазурный”, 08.10 — стаянка паміж гандлёвымі кропкамі “Домовой ” і “Северный”.

Адкрытае акцыянернае таварыства “Белгазбуд” зараз вядзе работы па пракладцы газаправода на дарозе    М-5 Мінск-Гомель у раёне Жлобіна, цеплатрасы да жылых дамоў у Мачулішчах Мінскага раёна, 16-кватэрнага і 144-кватэрнага дамоў у Асіповічах, а таксама газіфікацыі аграгарадка Ліпень. За студзень-жнівень выкананне планавых паказчыкаў склала 25,5 мільярда рублёў або 130%. Прадпрыемства атрымала прыбытак у паўтара мільярда, выпрацоўка на аднаго працуючага — 319 мільёнаў пры плане 240. Сярэднемясячны заробак — 9,7 мільёна рублёў.

Адзін з відаў дзейнасці Асіповіцкага камбіната бытавога абслугоўвання — аказанне рытуальных паслуг, у ліку якіх — выраб карзін і вянкоў. З пачатку года як на сяле, так і ў горадзе іх рэалізавана каля 700 штук, атрымана 170 мільёнаў рублёў.

Сялянска-фермерская гаспадарка “Сухлава” сёлета на сваіх палетках, размешчаных на 110 гектарах, вырошчвала авёс, ячмень, пшаніцу, грэчку і жыта. Апошняй культуры ў дзяржаўныя засекі здадзена  10 тон. На камбінат хлеба-прадуктаў рэалізавана і   16 тон грэчкі. Таксама вырас добры ўраджай морквы, буракоў і бульбы.

У Цэнтры творчасці дзяцей і моладзі ў гэтым навучальным годзе працуе 129 дзіцячых аб’яднанняў, якія наведваюць амаль дзве з паловай тысячы вучняў. 10 груп працуюць на платнай аснове. Заняткі вядуцца па наступных накірунках: тэатральна-мастацкі, дэкаратыўна-прыкладны, тэхнічны, эколага-біялагічны. Адзін з новых відаў дзейнасці — тэатр мод.

4 кастрычніка пачынаецца асенне-зімовы сезон палявання на нармаваныя віды дзікіх жывёл: лася, аленя, казулю і дзіка на ўтылізацыю, а таксама на лісу і зайца для паляўнічых — уладальнікаў сабак, якія маюць палявыя дыпломы.